Алтынньы ый 1 күнүгэр өрөспүүбүлүкэҕэ бүтүн Россиятааҕы хаамыы күнүн чэрчитинэн сарсыардааҥы зарядка уонна хотугу хаамыыга маастар-кылаастар ыытыллыахтара.
Тэрээһин «Туймаада» стадиоҥҥа уонна култуура, сынньалаҥ пааркатыгар буолар. Кыттааччылары бэлиэтээһин сарсыарда 09.00 ч. саҕаланар, хаамыы күнэ 10.00 ч. арыллар. «Доруобуйа ыллыгынан» 3 км усталаах сиринэн маассабай спортивнай хаамыы буолуоҕа.
«Спортивнай ыал», «Хотугу хаамыы тиэхиникэтин сатааччы», «Саамай саастаах кыттааччы», «Саамай элбэх кыттааччылаах тэрээһин» уонна «Саамай сырдык таҥастаах түмсүү» диэн анал номинациялары тэрээһин түмүгэр туттарыахтара. Күрэх кыайыылахтарын дипломунан уонна кубагынан наҕараадалыахтара.
