Аммаҕа кыһыны атаарыы чэрчитинэн өрөспүүбүлүкэтээҕи ат сүүрдүүтэ буолан ааста.
Күрэххэ Чурапчыттан, Горнайтан, Тааттаттан, Мэҥэ Хаҥаластан, Уус Алдантан уонна Амматтан уопсайа 35 боруода сүүрүк ат кэлэн бастыыр иһин илин-кэлин түһүстэ. Чурапчыттан Анатолий Куличкин жокейдаах Мэйн Конинг тэҥнээҕин булбата.
«Бүгүҥҥү күнтэн өрөспүүбүлүкэбитигэр ат сүүрдүүтэ саҕаланар. Саамай улахан сүүрдүүбүт Кыайыы күнүгэр Дьокуускайга АГАТУ ипподромугар буолара былааннанар. 2021 сылга соҕурууттан элбэх сылгыны аҕаллыбыт, олор бастакы сүүрүүлэрин көрүөхпүт», — диэн Ил Түмэн дьокутаата, СӨ ат спордун федерациятын бэрэсидьиэнэ Руслан Федотов кэпсээтэ.
Бэрт тыҥааһыннаах сүүрүүнү көрөн дьон сүргэтэ көтөҕүлүннэ.
