Анаабыр улууһун спортсменнара Горнай улууһугар ыытыллар «Манчаары оонньууларыгар» кыттаары бэлэмнэнэллэр. Быйыл Спартакиадаҕа улуустан 30 киһи кыттыаҕа.
«Мин чэпчэки атлетикаҕа 100 миэтирэҕэ уонна 5 килэмиэтиргэ сүүрэбин. Куоракка миигин «Юность» стадиоҥҥа Любовь Спиридонова эрчийэр. Мин саныырбынан, Манчаары оонньууларыгар үчүгэйдик кытыннахпытына, Анаабыр аатын чиэстээхтик көмүскүөм. Кыттааччылар үөрэ-көтө, бэйэлэригэр эрэллээх, күүстээх санаалаах буолан сылдьалларыгар баҕарабын», — диэн Василий Спиридонов эттэ.
Таина Спиридонова хоту многоборьенан дьарыктаммыта биэс сыл буолбут. Быйыл «Манчаары оонньууларыгар» утумнаах бэлэмнэнии түмүгүнэн – бастыыр сыалы туруоруммут.
«Анаабыртан Бэрдьигэстээххэ диэри 10 чаас айаннаан кэллибит. Уустук соҕус айан ааста. Билигин барыта үчүгэй буолла. «Манчаары оонньууларыгар» бастакыбын кыттабын. Сарсын кыттар буоламмын кыратык долгуйабын. Бастаан үс төгүл үс, ол кэннэ сүүрүү. Кыттааччыларга ситиһиини баҕарыам этэ. Ким кыахтаах, үрдүк таһымнаах, ол кыайыа», — диэн кыыс кэпсээтэ.
«Манчаары оонньуулара» спорт национальнай көрүҥнэригэр спартакиадата от ыйын 6-11 күннэригэр буолуоҕа. Күрэхтэһиини «Якутия 24», «Саха» НКИХ, «Мамонт» ханаалларыгар, «Тэтим» радиоҕа, ону тэҥэ YouTube-ка көрүөххэ сөп.
Көрөөччүлэр «Манчаары оонньууларын» аһыллыытын уонна сабыллыытын сиэрин-туомун театрализованнай бырагырааматын, чэпчэки атлетика, сахалыы ыстаныы, национальнай многоборье көрүҥнэри, мас тардыһыытын, хапсаҕайы уонна ат сүүрдүүтүн күрэхтэһиилэрин көрүөхтэрэ.
Спартакиада үөрүүлээх аһыллыытын быһа эфирэ от ыйын 7 күнүгэр 21:00 чаастан саҕаланыаҕа.
Быһа эфир, ону тэҥэ «Манчаары оонньууларын» быһа эфирдэрин бары уһуллуутун «Саха» НКИХ AppStore-га уонна GooglePlay-гэ мобильнай сыһыарыытыгар баар буолуоҕа.
