Өрөспүүбүлүкэтээҕи борокуратуура Анаабыр улууһун Сааскылаах сэлиэнньэтигэр убаҕас оттук цистерната умайыытынан бэрэбиэркэ тэрийдэ. Бу туһунан хонтуруоллуур-кэтиир уорган пресс-сулууспата иһитиннэрэр.
Суһал иһитиннэриинэн, умайыы кэмигэр цистернаҕа 480 туонна убаҕас оттук баара билиннэ. Умайыы биричиинэтинэн, массыына заправкаланар кэмигэр статикаттан буолара сабаҕаланар.
Быһылаан тахсыбыт сиригэр Анаабыр улууһун борокуруорун эбээһинэһин толорооччу уорганнар үлэлэрин сүрүннүүр сыаллаах таҕыста.
Бэрэбиэркэ түмүгүнэн борокуратуура цистерна умайыытын биричиинэтин, ыксаллаах быһыыга-майгыга нэһилиэнньэҕэ уонна территорияҕа промышленнай куттал суох буолуутун тутуһууну быһаарыаҕа.
