Бэҕэһээ, бэс ыйын 18 күнүгэр, РФ бэрэсидьиэнэ Владимир Путин үлэ сырыытынан өрөспүүбүлүкэ киин куоратыгар кэлэн барбыта. Владимир Путиҥҥа СӨ вице-премьерэ Анатолий Семенов Саха сиригэр суперкампус бырайыагын туһунан кэпсээбитэ.
Ол курдук, үрдүк үөрэх кыһаларын икки ардыларынааҕы кампус тутуута өрөспүүбүлүкэ университеттарын холбуо. ХИФУ, АГАТУ, АГИКИ билимин кииннэрэ уонна Саха сирин индустриальнай партнердара сыраларын бииргэ түмтэхтэринэ Уһук Илин талааннаах эдэр ыччатын ыҥырыа.
«Бу бырайыагы өйүөххэ наада», – диэбитэ Владимир Путин.
Дойду бэрэсидьиэнин сорудаҕынан, 2030 сылга диэри Россияҕа аан дойдутааҕы таһымнаах 25 кампус тутуллуоҕа. Бастакы 17 бырайыагы олоххо киллэрэргэ 2021-2022 сылларга быһаарбыттара. Билигин өрөспүүбүлүкэ аныгыскы сүүмэрдээһиҥҥэ кыттарга бэлэмнэнэр, сүүмэрдээһин түмүгүнэн эбии аҕыс кампус бырайыагын бигэргэтиэхтэрэ.
Суперкампус уопсай иэнэ 120 тыһ тахса кв.м. тэҥ буолуоҕа.
«Дьокуускайга ВУЗтар икки ардыларынааҕы кампус дойду хотугу-илинин түмэр биир уопсастыбаннай, култуурунай, үөрэх уонна билим сирэ буолуоҕа. Бырайыагы олоххо киллэрии үрдүк уонна орто үөрэх систиэмэтин саҥа хаачыстыбаннай сайдыы таһымыгар таһаарыаҕа. Биһиги Владимир Владимирович өйөбүлүгэр уонна суперкампус бырайыага олоххо киириэ диэн олус эрэнэбит», – диэн ХИФУ ректора Анатолий Николаев эттэ.
Хаартыска: Андрей Сорокин
