Бүгүн, олунньу 23 күнүгэр, Россия бэрэсидьиэнэ Владимир Путин «Тута» диэн позывнойдаах ефрейтор Андрей Григорьевка РФ Дьоруойун сулуһун туттарбытыттан ыла биир сыл толору буолла. Саха киһитэ бу үрдүк судаарыстыбаннай наҕарааданы анал байыаннай дьайыы кэмигэр көрдөрбүт хорсун быһыытын, эр санаатын иһин ылбыта.
Саха сирин олохтоохторо бу күн өрөспүүбүлүкэҕэ ураты суолталааҕын бэлиэтииллэр. Кинилэр этэллэринэн, Тута историята – бу куттала суох буолуу, тактическай сатабыл уонна тыыннаах хаалан олоххо тардыһыы туһунан ураты история. Дьоруой элбэх Аҕа дойду көмүскээччилэригэр бэйэтин үтүө холобурунан олоххо тардыһыыга күүс-уох биэрэр. Дьиҥнээх күүс эт-хаан күүһүгэр эрэ буолбакка, эр санааҕа уонна дойдуга бэриниигэ сытарын көрдөрөр.
«Аҕа дойдуну көмүскээччи күнүгэр Андрей Григорьев Россия Федерациятын Дьоруойун Көмүс Сулуһунан наҕараадаланна. Бу наҕараада кини хорсун санаатын, тулуурун уонна дьоруойдуу быһыытын билинии буолар. Кини илиинэн киирсиитэ кыайтарбат баҕа уонна дьиҥнээх патриотизм бэлиэтэ буолла. Кини наҕараадалар иһин буолбакка, Аҕа дойду иһин, доҕотторун иһин, эйэлээх кэскил иһин сэриилэспитэ. Билигин дьоһуннаахтык ылбыт Көмүс Сулуһа кини түөһүгэр умайар, оттон аата Россия историятыгар киирдэ», – диэн ол устуоруйаҕа суолталаах күн Айсен Николаев бэйэтин санаатын эппитэ.
Андрей Григорьев 2024 сыл күһүнүгэр Донецкай Норуот Өрөспүүбүлүкэтин Трудовое бөһүөлэгин ылыы кэмигэр Украина Сэбилэниилээх Күүстэрин боевигын кытта тыын былдьаһыктаах киирсиигэ кыайбыта. 2025 сыл тохсунньутун саҕаланыытыгар бу кыргыһыы видеота аан дойду социальнай ситимнэригэр уонна СМИ-га тарҕаммыта. Ол хорсун быһыытын кэнниттэн Андрей Григорьев байыаннай сорудахтары толорорун салҕаабыта, бөһүөлэккэ Украина Сэбилэниилээх Күүстэригэр улахан хоромньуну оҥорбута.
Андрей Григорьев этэринэн, өстөөҕү кытта киирсиитигэр кини эбэтэр өстөөх тыыннаах хааларын өйдөөбүтэ. Кыайан тыыннаах хаалан кини өстөөх тыылыгар өссө хас да күн буолбута уонна өстөөх хас да байыаннай сулууспалааҕын, бронетиэхиньикэтин суох оҥорбута, сэрии сэбин ыскылаатын тоҕо тэптэрбитэ. Онтон бэйэтин подразделениеларыгар тахсыбыта.
Россия Дьоруойа «Якутия – Земля героев» каадыр бэлэмниир бырагыраама кыттыылааҕа. Кини бырагыраама кыттыылаахтара дойдуларыгар, өрөспүүбүлүкэҕэ уонна бэйэлэрин норуоттарыгар бэриниилээх буолуохтаахтар дии саныыр.
Ону таһынан, Андрей Григорьев 2025 сыл балаҕан ыйыгар Арктическай судаарыстыбаннай агротехнологическай университекка «Агроинженерия» хайысхатынан үөрэххэ киирбитэ. Кини бэйэтин фермэтин тутуон баҕарар уонна ыра санаатын олоххо киллэрэргэ хардыылары оҥорор.
РФ Дьоруойа Андрей Григорьев 2025 сыл ыам ыйын 9 күнүгэр Москваҕа Кыайыы 85 сылыгар анаммыт Кыһыл болуоссакка аан дойду державаларын баһылыктарын кытта параакка кыттыбыта.
Ааспыт сыл ыам ыйыгар Саха сирин Сокровищницатыгар Андрей Григорьевка 25 караттан тахса ыйааһыннаах анал ааттаах алмаас копиятын туттарыы үөрүүлээх сиэрэ-туома буолбута.
Саха сирэ уонна Донецкай Норуот Өрөспүүбүлүкэтэ Россия Дьоруойун туһунан уус-уран киинэни устуохтарын былаанныыллар, бу туһунан регионнар баһылыктара ПМЭФ-2025 кэмигэр сөбүлэһиини ситиспиттэрэ. РФ бэрэсидьиэнэ Владимир Путин 2025 сыл түмүгүнэн ыытыллыбыт пресс-кэмпириэнсийэҕэ киинэ прокатын өйүөххэ наадатын эппитэ.
Дьокуускай куоракка Хабаров уулуссатыгар Кыайыы болуоссатын таһыгар биир элбэх кыбартыыралаах дьиэни «Тута» диэн позывнойдаах хорсун буойуҥҥа анаммыт мурал киэргэппитэ. Ойуу ааптарынан РФ үтүөлээх худуоһунньуга, Саха сирин искусствотын үтүөлээх диэйэтэлэ Михаил Старостин буолар.
Россия Дьоруойа Андрей Григорьев анал байыаннай дьайыы кэмигэр дойду үрдүк наҕараадатын ылбыт 10-с саха киһитэ буолла.
Санатан эттэххэ, Россия Федерациятын Дьоруойун аатын уон икки саха киһитэ ылбыта: Александр Колесов, Филипп Евсеев, Алексей Неустроев, Игорь Юргин, Николай Соболев, Дмитрий Егоров (өлбүтүн кэннэ), Николай Евдокимов, Родимир Максимов, Дмитрий Куценко, Андрей Григорьев, Петр Киприянов (өлбүтүн кэннэ), Алексей Петров.
Хаартыска: Александр Казаков/РФ бэрэсидьиэнин пресс-сулууспата/ТАСС
