СӨ бырабыыталыстыбатын бэрэссэдээтэлэ Андрей Тарасенко Бүлүү оройуонун социальнай-экономическай сайдыытын боппуруоһун көрдө. Бу туһунан СӨ бырабыыталыстыбатын уонна баһылыгын дьаһалтатын пресс-сулууспата иһитиннэрэр.
Премьер-миниистир бэлиэтээбитинэн, улууска тыа хаһаайыстыбата сайдар, туорахтаах култуураны үүннэриигэ ситиһиилэр бааллар, бэйэ бурдугун оҥоруу, ыам көрдөрүүтэ үрдүк. Андрей Тарасенко нэһилиэнньэ дохуотун үрдэтэр сыалтан эбии кыылы-сүөлү аҕалар наадалааҕын ыйда.
Оройуон баһылыга Сергей Винокуров бэлиэтээбитинэн, бүтэһик үс сыл иһигэр федеральнай, өрөспүүбүлүкэтээҕи уонна муниципальнай бырагыраамаларынан Бүлүүгэ 28,5 тыһыынча квадратнай миэтэрэ олорор дьиэ, ол иһигэр 21,5 тыһыынча квадратнай миэтэрэ чааһынай уонна 7 тыһыынча квадратнай миэтэрэ иэннээх элбэх кыбартыыралаах дьиэлэри туттулар. Хаарбах дьиэттэн көһөрүү бырагырааматынан 161 ыал кыбартыыра ылла. Тулаайах оҕолор бөлөхтөрүгэр киирэр 35 гражданин толору хааччыллыылаах дьиэлэннэ, «Эдэр ыалы дьиэнэн хааччыйыы» бырагырааматынан 52 ыал олорор усулуобуйатын тупсарда.
Бэйэлэрин хайысхаларынан сүбэ мунньахха оройуон салайааччылара санааларын эттилэр. Кинилэр Бүлүү куоратыгар 990 миэстэлээх саҥа оскуола, бассейнаах спортивнай комплекс, ууну ыраастыыр ыстаансыйа, полигон, Кыһыл Сыыр сэлиэнньэтигэр поликлиника тутуутун, Бөтүҥ сэлиэнньэтигэр диэри суолу саҥардыы боппуруостарын көтөхтүлэр.
Түмүккэ Андрей Тарасенко мунньахха киирбит боппуруостар бырабыыталыстыба таһымыгар көрүллэллэрин бэлиэтээтэ. Бүлүүгэ электроэнергия кыамтатын туһунан боппуруоска оройуоҥҥа газ генерациятын эбийиэгин тутуу боппуруоһун чопчулаата. Саҥа оскуолалар тутууларыгар, ону тэҥэ үөрэх тэрилтэлэрин дьиэлэрин хапытаалынай өрөмүөнүгэр үбү ыларга өрөспүүбүлүкэ Бырабыыталыстыбатыгар сайаапка ыытар туһунан Андрей Владимирович санатта. Бырабыыталыстыба бэрэссэдээтэлэ оройуон сиригэр-уотугар үлэлиир промышленнай хампаанньалар Бүлүү оройуонун нэһилиэнньэлээх пууннарын сайыннарыыга кылааттарын киллэриилэрин туһунан боппуруоһу көтөхтө.
