Өрөспүүбүлүкэ бырабыыталыстыбатын бэрэссэдээтэлэ Андрей Тарасенко «Саха» национальнай көрдөрөр-иһитиннэрэр хампаанньа үлэтин кытта билистэ. Премьер сүрүн аппаратнай-студийнай комплекстарга, быһа эфирдэр павильоннарыгар, телевидение музейыгар, «Якутия 24» ханаал уонна араадьыйа студияларыгар сырытта. Хампаанньа хааччыллыытын уонна материальнай-техническай баазатын көрдө-иһиттэ.
Кэллэктииби кытта көрсүһүү кэмигэр ханааллар айар-тутар кэскиллэрин кэҥэтии, хампаанньаны сайыннарыы уонна өйөөһүн боппуруостара таарылыннылар. Ону тэҥэ үлэһиттэргэ судаарыстыбаннай наҕараадалары туттарыы буолла.
Ол курдук, өрөспүүбүлүкэ телевидениетин уонна араадьыйатын сайыннарыыга уонна регион социальнай-экономическай сайдыытыгар тус кылаатын иһин «Гражданскай килбиэн» туйгун бэлиэ генеральнай дириэктэр сүбэһитигэр Нина Харитоноваҕа туттарылынна.
«Саха» НКИХ эфиргэ таһаарыы дирекциятын режиссера Радомир Томскай өрөспүүбүлүкэ телевидениетин уонна араадьыйатын сайыннарыыга кылаатын иһин Саха өрөспүүбүлүкэтин бырабыыталыстыбатын грамотатын тутта.
Телевидение көһө сылдьар оборудованиетын салаатын инженерэ Сүргэн Саввинов Саха өрөспүүбүлүкэтин бырабыыталыстыбатын бэрэссэдээтэлин махтал суругун тутта.
Хампаанньа генеральнай дириэктэрэ Олег Марковка «Саха сирин телевидениетин уонна араадьыйатын туйгуна» бэлиэ туттарылынна.
