Аҕыйах хонуктааҕыта С.А. Новгородов аатынан «Айар» национальнай кыһа массовай редакциятын редактора Анжелика Эверстова «Слово» диэн национальнай литературнай бириэмийэ «Уус уран тылбаас. Эдэр ааптар» анал аатыгар «Дьэҥкир сурук» (Кинигэ ааптара — Наталья Харлампьева) диэн кинигэни тылбаастаан кыайыылааҕынан тахсыбытын истибиппит.
Төрөөбүт тыл уонна сурук-бичик күнүн көрсө Анжелика ситиһиитинэн саха тылбааһа үрдүк таһымнааҕын көрдөрдө, ону тэҥэ ыччат төрүт литератураҕа интэриэһэ үрдээбитин бэлиэтээтэ. Биһиги, суруналыыстар, кинини кытта сэһэргэстибит.
Анжелика, тылбааһынан хаһааҥҥыттан дьарыктанаҕын? Сиһилии кэпсиэҥ дуо?
Мин А.М. Горькай аатынан Литературнай институт уус-уран тылбаас уонна литература үлэһитин салаатын бүтэрбитим. Билигин С.А. Новгородов аатынан «Айар» национальнай кыһа массовай редакцияҕа редакторынан үлэлиибин.
Хайдах бу айымньыны талбыккыный?
Н.И. Харлампьева «Дьэҥкир сурук» айымньытын маастарым А.Е. Шапошникова сүбэтинэн талан тылбаастаабытым. Бу кинигэ — автобиографическай матыыптаах сэһэнинэн эссе. Бастатан туран, бу айымньы миигин ис хоһоонунан умсугуппута. Ааптар айымньытын ааҕааччыга анаммыт сурук быһыытынан суруйбут. Аһаҕастык, тугу да кистээбэккэ, бэйэтин олоҕун туһунан кэпсиир, билиитин-көрүүтүн үллэстэр, түмүк таһаарар. Ол түмүктэрин ааҕааччы сүбэ курдук ааҕыан, туһаныан сөп.
Тылбаас эн олоххор оруола?
Уус-уран тылбааһы мин олус чугастык ылынабын. Тиэкис редакциялыыр курдук, тылбаастыыргар эн ааптар эйгэтигэр киирэҕин, тугу санаабытын, тугу ааҕааччыга тиэрдиэҕин баҕарбытын таайыахтааххын. Бу манна өй-санаа, иэйии, ис дууһан алтыһаннар үлэлииллэр. Итинник үлэ эйигин мэлдьи аһаҕас буоларга, элбэх атын санаалары, олох көрүүлэрин ылынар буоларга уһуйар.
Төһө өр тылбаастаатыҥ?
Мин тылбааһынан дьарыктаммытым алта сыл буолла. Үөрэхпин бүтэрэн, эдэр исписэлиис быһыытынан үлэлээбитим балтараа эрэ сыл буолла.
Өссө ханнык үлэлэрдээххин?
Бу тылбааһым — дипломнай үлэм. Онтон ураты кыра сэһэннэри, кэпсээннэри эрэ тылбаастаабытым. «Айар» кинигэ кыһатыгар үлэлии сылдьаммын Сардаана «Кимиэхэ да этимэ» сэһэнин экспертизаҕа ыытарбытыгар бэлэмнээбитим, нууччалыы тылбаастаабытым.
Инники былааныҥ?
Инники былааммар салгыы бу хайысхаҕа үлэлиэхпин, сайдыахпын баҕарабын, бэйэм айымньыларбын суруйохпун, таһаарыахпын баҕарабын, эбии — сахалыы тылынан.
Тылбаас таһынан тугунан дьарыктанаргын сөбүлүүгүн?
Уус-уран айымньылары, рецензиялары, билим эйгэтигэр сыһыаннаах ыстатыйаалары суруйабын. Соторутааҕыта ВСГИК норуоттар икки ардыларынааҕы конференциятыгар кыттыбытым, «Аныгы саха литературата. Уус-уран тылбаас саха, нуучча литературатыгар сабыдыала» диэн дакылаат аахпытым.
