«Арепливир» — амбулаторнай усулуобуйаҕа эмтэнэргэ көҥүллэнэр, коронавирус утары эмп атыыта Россияҕа саҕаланна. Бу туһунан ТАСС иһитиннэрэр.
«Бүгүн официально атыыга таһаарбыт бастакы күммүт. Сүрүн улахан аптека ситимнэрэ уонна дистрибьютордар бары бу эми сакаастаатылар. Сарсыардаттан сакаастары тутабыт уонна тириэрдэбит. Түмүгү таһаарар эрдэ», — диэн «Промомед» эмп оҥорор хампаанньа генеральнай дириэктэрэ Андрей Младенцев кэпсээтэ.
Эми атыылааһын бастакы түһүмэҕэр, Россия 10 тыһыынча кэриҥэ аптекатыгар атыыга киирэрэ былааннанар. Кэлин препараты атыылыыр туочукалар ахсааннара кэҥиэҕэ.
«Арепливир» препарат биир упаковкатын сыаната 12 320 солкуобайтан саҕаланыаҕа. Упаковкаҕа 200 мг кэриҥнээх 40 таблетка киирэр.
