«Азия оҕолоро» оонньууларыгар буоксаҕа 46 киилэҕэ диэри ыйааһыҥҥа киирсэн Александра Слепцова Саха сирин сүүмэрдэммит хамаандатыгар өссө биир кыһыл көмүс мэтээли аҕалла. Бу туһунан кини тренерэ Ариан Монастырев иһитиннэрэр.
Александраны тренерэ Ариан Монастырев уонна кыргыттарга СӨ старшай тренерэ Оксана Васильева арыаллаан кэллилэр. Сэттис кылаастан уһуйбут тренерэ кыайыыга эрэллээх кэлбитин бэлиэтээтэ.
«Саша Мэҥэ Хаҥалас улууһун И.Г. Игнатьев аатынан Хара орто оскуолатын үөрэнээччитэ. Миэхэ сэттис кылаастан утумнаахтык дьарыктанар. Быйыл тохсус кылааһы бүтэрдэ. Онон үөрэнэрин, эксээмэннэрин таһынан буоксанан дьарыгын тохтоппокко, кыайыыга дьулуһан туран дьарыктанна. «Азия оҕолоро» оонньууларыгар кытта кэлэрбитигэр кыайыыга эрэллээх этибит», — диэтэ тренерэ Ариан Монастырев.
Түмүк киирсиигэ Александра Слепцова Узбекистан бэрэстэбиитэлин Жасмина Тохированы кыайан чемпион үрдүк аатын ылла.
Санатан эттэххэ, Саха сириттэн буоксаҕа кыргыттарга икки спортсмен кыттыыны ылла. Ол курдук Ньурба оройуонуттан Нарыйаана Васильева 54 киилэ ыйааһыҥҥа боруонса мэтээли ылары ситистэ.
