Ил Дархан Айсен Николаев Саха сирин Арктикатын улуустарыгар атыы-логистическай кииннэри тутуу туһунан санааны өйөөтө. Бу туһунан «Якутопторг» АУо пресс-сулууспата иһитиннэрэр.
«Хампаанньа салалтата атыы-логистическай кииннэри тутуу боппуруостарын быһаарар. Бастакы түһүмэххэ кииннэр Үрүҥ Хайа, Черскэй уонна Уус Куйга бөһүөлэктэригэр тутуллаллара былааннанар. Барыта 12 эбийиэк түһүмэҕинэн тутуллуоҕа», — диэн этиллэр.
Бу сыалга 780 мөлүйүөн солкуобай үп ирдэнэрэ бэлиэтэнэр. Бырайыагы олоххо киллэрии Саха сирин хоту улуустарыгар социальнай суолталаах ас-үөл бородуукталарын кэмигэр уонна хаачыстыбалаахтык тиэйии кыһалҕатын быһаарарга көмөлөһүөҕэ.
Бүгүҥҥү күҥҥэ тэрилтэ 18 салаатыгар баар ааспыт үйэ 60-с сылларыгар тутуллубут ыскылааттарын 80 %-н кэриҥэ туһаттан тахсыбыт. Үгүс өттүгэр оҕуруот аһын уонна түргэнник буорту буолар бородуукталары харайар усулуобуйалаах ыскылааттар суохтар.
