Атырдьах ыйыгар «Армия-2024» сыллата буолар норуоттар икки ардыларынааҕы байыаннай-техническэй форум үлэтин саҕалыаҕа. Быйыл форум үс күн ыытыллара бэлиэтэнэр. Тэрээһин хаһан буоларын, кыттааччылары хайдах бырагыраама күүтэрин уонна 2024 сыллааҕы форум хонуутугар тугу кэпсэтэллэрин матырыйаалтан билсиҥ.
«Армия-2024» форум — тэрээһин туһунан
Россия обороннай комплексын ситиһиитин киэҥ быыстапката РФ Бырабыыталыстыбатын дьаһалынан 2015 сылтан саҕалаан ыытыллар. Форум үлэлиэҕиттэн ыла байыаннай бородууксуйа быыстапкатын тэрээһинэ аан дойду таһымнаах буолла уонна дойдулар икки ардыларыгар байыаннай-техническэй бииргэ үлэлэһиигэ сүҥкэн кылааты киллэрдэ. Сыл аайы араас дойду обороннай салаатын бэрэстэбиитэллэрэ сөптөөх, табыгастаах сөбүлэҥи түһэрсэр сыалтан форумҥа сылдьаллар.
Тэрээһин чэрчитинэн үгэс быһыытынан сабыылаах павильоннарга уонна уулуссатааҕы былаһааккаҕа элбэх экспозиция турара былааннанар. Форум ыалдьыттара РФ Сэбилэниилээх Күүстэрин аныгы сэптэрин-сэбиргэллэрин, тиэхиньикэлэрин, ону тэҥэ искусственнай интеллект көмөтүнэн оҥоһуллубут айан оҥоруулары кытары билсиэхтэрэ. Ону таһынан, научнай-дьыалабыай бырагыраама, култуурунай-сырдатар тэрээһиннэр ыытыллаллара былааннанар. Форум тэрийээччитэ — РФ Оборонаҕа министиэристибэтэ.
Форум бастакы күнэ үгэс быһыытынан сабыылаах эрэһииминэн буолуоҕа. Оттон атырдьах ыйын 13-14 күннэригэр тэрээһиҥҥэ билиэтинэн сылдьыахха сөп.
«Армия-2024» форум — буолар сирэ, бириэмэтэ, билиэтэ
Хас сыл аайы форум «Патриот» конгресснай-выставочнай кииҥҥэ Кубинка аэродомҥа уонна Подмосковьеҕа Алабино полигоҥҥа буолар. Эрдэ форум сэттэ күн буолар эбит буоллаҕына быйылгы тэрээһини үс күҥҥэ былааннаабыттар, ол эбэтэр атырдьай ыйын 12-14 күннэригэр.
«Армия-2024» форумҥа билиэттэр атыыга тахсыбыттар. Тэрийээччилэр этэллэринэн, тэрээһиҥҥэ киириигэ пааспар ирдэниллэр. Куттал суох буолуутун хааччыйар сыалтан киириигэ кэлбит дьону барыларын бэрэбиэркэлиэхтэрэ.
