Саха сириттэн төрүттээх, Беларусь сүүмэрдэммит хамаандатыттан кыттар Арыйаан Тютрин Варшава куоракка буолбут көҥүл тустууга Европа чемпионатыгар боруонса мэтээли ылары ситистэ.
Үһүс миэстэ иһин киирсиигэ Уус Алдантан төрүттээх бөҕөс 23 саастарыгар диэри Европа чемпиона Никлас Стехелы кытта киирсэн 4-1 ахсаанынан кыайда.
«4-1 ахсаанынан Арыйаан кыайан баран Саха сирин тустуутун оскуолата аан дойду үрдүнэн биир күүстээх буоларын дакаастаата. Кини ылбыт мэтээлэ элбэх сыллаах үлэ, тренердэрин, чугас дьоннорун уонна бүттүүн өрөспүүбүлүкэ өйөбүллэрин көрдөрүүтэ буолар. Саха сирэ киэн туттар! Үрдүктэн үрдүк чыпчааллары дабайарга!», – диэн Ил Дархан Айсен Николаев тустуугу улахан ситиһиитинэн эҕэрдэлээтэ.
