Миирнэй оройуонугар Арыылаах сэлиэнньэ чугаһыгар турбут баһаары умуруорууга 200-тэн тахса киһи уонна икки бөртөлүөт үлэлиир. Бу туһунан СӨ бырабыытылыстыбатын уонна баһылыгын дьаһалтатын пресс-сулууспата иһитиннэрэр.
Бу туһунан Саха сирин сиригэр-уотугар ойуур баһаарын билиҥҥи туругун баһаартан ойууру харыстааһыҥҥа өрөспүүбүлүкэтээҕи штаб мунньаҕар бастакы вице-премьер Дмитрий Садовников иһитиннэрдэ.
«Миирнэй оройуонугар сэлиэнньэттэн үс килэмиэтирдээх сиргэ 1500 га иэннээх уот умайар, бүтэһик сууккаҕа баһаар иэнэ улааппыта бэлиэтэммэтэ. Баһаары умуруорууга 202 киһи уонна 23 тиэхиньикэ үлэлиир, Ми-26, Ми-171 бөртөлүөттэр уу куттулар. Билиҥҥитэ нэһилиэнньэлээх пууҥҥа куттал суоһаабат. Ол эрээри „Орленок” сынньалаҥ лааҕыр оройуонугар өрүһһнэн баһаар кэлэр куттал оннунан хаалар», — диэтэ Садовников. Кини миэстэтигэр Бе-200 сөмөлүөтү ыытарга соруйда.
Ону тэҥэ Садовников оройуоннар баһылыктарыгар баһаары умуруорарга кэлэр сууккаларга ардах, тыал түһэрин учуоттаан баран биирдэ тэринэн барарга сүбэлээтэ.
«Бу күннэргэ биһиги баһаар ахсаанын аҕыйаттыбыт, билигин 100-тэн кыччаата. Балаһыанньа тупсарыгар атырдьах ыйын бастакы аҥаарыгар суһаллык, күүскэ үлэлиэххэ наада», — диэн вице-премьер бэлиэтээтэ.
