✨💫🚀🌎🌌Муус устар 12 күнүгэр аан дойдутааҕы авиация федерациятын күнүн быһаарыытынан — авиация уонна космонавтика аан дойдутааҕы күнэ бэлиэтэнэр.
Космонавтика сайдыытын төрүттээччилэринэн Константин Циолковскай уонна Сергей Королев буолаллар.
Историяны сэгэтэн:
🌠1957 сыл алтынньы 4 күнүгэр – сир бастакы оҥоһуу спутнига көтүтүллүбүтэ
🐶1957 сыл сэтинньи 3 күнүгэр – кабинатыгар Лайка ыттаах сир иккис спутнига көтүтүллүбүтэ
🌏1958 сыл ыам ыйын 15 күнүгэр – сир үһүс спутнига көтүтүллүбүтэ
🌔1959 сыл тохсунньу 2 күнүгэр – «Луна-1» ый бастакы спутнига көтүтүллүбүтэ
🐕🐕1960 сыл атырдьах ыйын 20 күнүгэр кабинатыгар Белка уонна Стрелка ыттардаах бастакы космическай хараабыл көппүтэ.
👨🏻🚀1961 сыл муус устар 12 күнүгэр – Юрий Гагарин «Восток-1» хараабылынан космос куйаарыгар 108 мүнүүтэ устата сири бастакынан эргийэ көппүтэ.
👩🏻🚀1963 сыл бэс ыйын 16 күнүгэр бастакы дьахтар космонавт Валентина Терешкова «Восток-6» харабылынан көппүтэ.
🌌1965 сыл кулун тутар 19 күнүгэр – Алексей Леонов бастакынан аһаҕас космоска тахсан 12 мүнүүтэ 9 сөкүүндэ устата сылдьыбыта.
🛰1970 сылга — «Луноход-1» бастакы планетоходу ыйга түһэрбиттэрэ.
🛰1970 сылга — «Венера-7» планетоходу Венераҕа түһэрбиттэрэ.
🛰1971 сылга — «Марс-3» планетоходу Марска түһэрбиттэрэ.
🛰1986 сыл олунньу 20 күнүгэр — «Мир» бастакы элбэх модуллаах орбитальнай чинчийэр станция көтүтүллүбүтэ. (2000 сылга диэри космос куйаарыгар көтө сылдьыбыта. Онно 28 научнай чинчийэр экспедиция ыытыллыбыта, 139 Россия уонна атын дойдулар чинчийээччилэрэ үлэлээбиттэрэ).
🚀Бүгүҥҥү күҥҥэ аан дойду үрдүнэн 28 кэриҥэ космодром баар
Россия алта космодромнаах: дойду иһигэр — Восточнай, Капустин Яр, Плесецк, Свободнай уонна Яснай, дойду тас өттүгэр – Байконур.
🚀Байконур – аан дойдуга бастакы уонна саамай улахан космодром буолар. Казахстан Кызылординскай уобалаһыгар баар. 1957 сыл алтынньы 4 күнүгэр бастакы көтүү оҥоһуллубута. Иэнэ 6717 км² тэҥнэһэр. Пилоттаах бырагыраамалары көтүтэр Россия соҕотох космодрома буолар – атыттар космонавтаах хараабыллары көтүтүүгэ барсыбаттар.
