Саха сирэ «Азия оҕолоро» норуоттар икки ардыларынааҕы оонньууларын тэрийэр регион быһыытынан, спорт бары 24 көрүҥнэригэр икки сүүмэрдэммит хамаанданы туруоруоҕа. Күрэх тэрийэр кэмитиэтэ иһитиннэринэн, бастакы хамаандаҕа 245 эдэр спортсмен, онтон иккис хамаандаҕа 110 спортсмен кыттыыны ылыахтара.
««Азия оҕолоро» оонньууларга кыттан уопут ылыахтара, маастар да нуорматын толоруохтара итиэннэ чөл олоххо, улахан спортка өссө биир хардыы чугаһаан биэриэхтэрэ. Мин «Азия оҕолоро» оонньууларга спорт чаҕылхай сулустара баар буолуохтара диэн эрэллээхпин», – диэн старшай тренер Олег Лапшин бэлиэтээн эттэ.
Бүгүн өрөспүүбүлүкэ харбааһыҥҥа хамаандата күүскэ бэлэмнэнэн саҕалаата. Хамаандаҕа Дьокуускайтан, Миирнэйтэн, Нерюнгриттан уонна Алдантан уопсайа 22 спортсмен баара бэлиэтэнэр.
Санатан эттэххэ, Дьокуускайга 2024 сылга бэс ыйын 25 күнүттэн от ыйын 7 күнүгэр диэри «Азия оҕолоро» норуоттар икки ардыларынааҕы VIII-с спортивнай оонньуулар ыытыллыахтара.
