Бүгүн, от ыйын 27 күнүгэр, Приморскай кыраай киинигэр Владивостокка «Азия оҕолоро» VI-c спортивнай оонньуулар мэтээллэрин сүрэхтэниитэ буолла.
Быйылгы оонньуулар мэтээллэрэ лотос сибэкки быһыытынан оҥоһулунна. Сибэкки Приморскай кыраай биир сүрүн билиэтэ буолар. Дизайн ааптардара бэлиэтээбиттэринэн, лотос уруккуну, билиҥҥини, инникини ситимниир.
«Лотос – сүҥкэн ситиһиилэри ситиһэргэ көҕүлүүр суолталаах», — диэн ааптардар эттилэр, кинилэр бэлиэтээбиттэринэн, мэтээллэр оонньуулар ыытыллар сирдэрин историятын уонна култууратын көрдөрөллөр.
Ону тэҥэ бүгүн, от ыйын 27 күнүгэр, оонньуулар кыттыылаахтарын форматын билиһиннэрдилэр. Ол курдук, волонтердар формалара розовай оҥнөөх буолуоҕа.
Розовай өҥ ыра санааны уонна эрэли үөскэтэр, тапталы уонна кыһамньыны көрдөрөр. Волонтердар күрэхтэһиигэ атмосфераны олохтууллар уонна ыарахан кэмҥэ көмөҕө кэлэргэ бэлэмнэр. Оонньууларга дойду араас регионнарыттан уонна тас дойдулартан 1000 волонтер үлэлиэҕэ.
Тылбаасчыттар формалара от күөх өҥтөн оҥоһуллубут. Күөх өҥнөөх дьолу-соргуну, эйэни, уоскуйууну көрдөрөр.
Судьуйалар таҥастара араҕас өҥнөөх буолуоҕа. Араҕас өҥ дьон санаатын өрө көтөҕөр. Оонньууларга 600-чэ киһи үлэлиэҕэ.
Санатан эттэххэ, «Азия оҕолоро» оонньуулар от ыйын 27 күнүттэн атырдьах ыйын 8 күнүгэр диэри ыытыллыахтара. Аан дойдутааҕы улахан күрэхтэһиигэ 19 көрүҥҥэ 273 комплект мэтээли оонньотуохтара.
