«Азия оҕолоро-2024» оонньуулар официальнай бродкастера «Саха» национальнай көрдөрөр-иһитиннэрэр хампаанньа буолар. Ол курдук, киэҥ хабааннаах спортивнай тэрээһини сырдатыыга медиахампаанньа 353 үлэһитэ кыттыыны ылыаҕа. Бу туһунан «Саха» НКИХ генеральнай дириэктэрэ Олег Марков бэйэтин телеграм ханаалыгар иһитиннэрдэ.
«Хампаанньа үлэһиттэригэр анаан тустаах мунньаҕы ыыттыбыт. Оонньуулар чэрчитинэн спорт 24 көрүҥүн суһаллык сырдатыыга алта көһө сылдьар телевизионнай ыстаансыйа үлэлиэҕэ, «МАТЧ ТВ» 21 үлэһитэ уонна «Саха» НКИХ 353 үлэһитэ кыттыахтара, ол иһигэр биһиги филиалларбытыттан 28 киһи хапсыаҕа. Быйылгы оонньууларга «Саха» НКИХ официальнай бродкастер буолар. Онон эппиэтинэс үрдүк», — диэн «Саха» НКИХ генеральнай дириэктэрэ бэлиэтээтэ.
Ону тэҥэ Олег Марков этэринэн, бары спортивнай күрэхтэһиини быһа эпииргэ көрдөрөр табыллыбат буолан, сорох көрүҥнэри көрөөччүлэр Оонньуулар күннүктэригэр көрүөхтэрин сөп.
«Күннүктэр сахалыы, нууччалыы, английскай тылларынан биһиги ханаалларбытыгар тахса тураллар», — диэн Олег Марков кэпсээтэ.
Санатар буоллахха, Дьокуускайга бэс ыйын 25 күнүттэн от ыйын 7 күнүгэр диэри «Азия оҕолоро» VIII оонньуулара ыытыллаллар.
