Бүгүн аан дойду үрдүнэн тыа сирин дьахталларын күнэ бэлиэтэнэр. Бу күнү бэлиэтиир туһунан аан маҥнай 1995 сыллаахха Пекин куоракка Холбоһуктаах нациялар тэрилтэлэрин иһинэн ыытыллыбыт төрдүс дьахталлар кэмпириэнсийэлэригэр тылы көтөхпүттэр. 2007 сыллаахха бигэргэнэн, сылын ахсын бэлиэтэнэр буолбут.
Бу күн тыа сирин дьахталларын үлэтэ уустугун, олох сайдарын туһугар киллэрэр кылааттарын санатар сыаллаах.
Күн бүгүн Саха сиригэр уопсайа 498 тыһыынча дьахтар аймах баар эбит буоллаҕына, 166 тыһыынчаттан тахса дьахтар тыа сиригэр олорор, бу тыа сиригэр олорор дьон ахсааныттан 50 %-гар тэҥнэһэр.
Мантан кыра аҥаара тыа сирин ыарахан үлэтигэр түбүгүрэр. Оттон сүрүн өттө үөрэх, атыы-эргиэн, тыа хаһаайыстыбатын салаатыгар үлэлиир.
Маныаха үлэтэ суох дьахтар ахсаана эр дьоннооҕор аҕыйах. Ааспыт сылынан холобурдаатахха, тыа сирин дьахталларын 59%-на үлэнэн хааччыллыбыт.
Ону таһынан, тыа сиригэр олорор дьахтар, куоракка олорор дьахтардааҕар элбэхтэ оҕолонор эбит.
Норуот олоҕун салҕааччы, төрүт култуураны, омук муудараһын тутан олорор тыа сирин дьахталлара күннээҕи уустугу аахсыбакка, айа-тута, үлэлии-хамсыы сылдьалларын өйдөөн, нэһилиэнньэ бу араҥатыгар ураты болҕомто, сыһыан баар буолуохтаах.
