Балаҕан ыйын 28 күнүгэр, киэһэ 19:30 чааска Өймөкөөн улууһун Биир кэлим дьуһуурунай-диспетчерскэй сулууспатыгар Куйдуһун өрүскэ эр киһи тимирдэ диэн иһитиннэрии киирбит.
1955 сыллаах төрүөх эр киһи сылгы иитэр баазатыттан өрүһүнэн устубут уонна тиийиэхтээх сиригэр тиийбэтэх. Кинини уола көрсүөхтээх эбит.
Айаннаан испит балыксыттар өрүскэ түҥнэри түспүт оҥочону көрбүттэрин эппиттэр. Олохтоох дьону кытта сүппүт киһи уола ол көрбүт сирдэригэр тахсан көрдөөбүттэр даҕаны булбатахтар.
Балаҕан ыйын 29 күнүгэр Саха сирин Быыһыыр сулууспатыттан түөрт водолаз көрдүү тахсыбыта, бөлөх старшайынан Дмитрий Асекритов буолбута.
Бүгүн, алтынньы 2 күнүгэр, сарсыарда 09:32 чааска водолазтар тимирбит киһи өлүгүн оҥочо түҥнэри түспүт сиригэр булбуттар. Өлүгү аймахтарыгар туттардылар.
Хаартыска: СӨ Быыһыыр сулууспата
