Бүгүн, муус устар 21 күнүгэр Россия бэрэсидьиэнэ Владимир Путин федеральнай мунньахха үгэс буолбут туһаайыытын этиэҕэ. Онно кини дойдуга баар балаһыанньаҕа бэйэтин сыаналааһын биэриэҕэ уонна сүрүн соруктары көрүүтүн иһитиннэриэҕэ. Бу туһунан ТАСС тириэрдэр.
Мунньахха Ил Дархан Айсен Николаев кыттыыны ылыаҕа.
Туһаайыы «Россия-1», «Россия-24» уонна «Первый канал» ханаалларга быһа эфиргэ көстүөҕэ. «Общественное телевидение России» (ОТР) ханаалга уонна сайтка эфир сурдопереводтаах көстүөҕэ.
Уһуна регламеннаммат. Бэрэсидьиэн 2018 сыллааҕы туһаайыыта саамай улахан кээмэйдээх: дойду баһылыгын этиитэ икки чаас кэриҥэ уһуннааҕа. Ортотунан чиэппэрдээх чаас курдук ыытыллар.
Тэрээһин «Манеж» киин быыстапка саалатыгар ыытыллар. Кремль үгэс быһыытынан туһаайыы ис хоһоонун арыйбат. Онуоха бэрэсидьиэн пресс-сэкэрэтээрэр Дмитрий Песков быйылгы парламеҥҥа ыҥырыы «хайдах да гыммыт иһин постковиднай буолуоҕа» диэн ыйда.
Кини тириэрдэринэн этии кризистан тахсыы, систиэмэлээх өйөбүл миэрэлэрин туһунан буолуон сөп. Быйыл ыытыллыахтаах парламент быыбара учуоттаммытын эбэн эттэ. Сорох тиэмэлэрин дойду баһылыга бэйэтэ ыйбыт.
Федерация Сэбиэтин бэрэссэдээтэлэ Валентина Матвиенко бэлиэтээбитинэн, сорох пууннар «сокуону оҥорооччулар үлэлэрин былаанын түргэнник олоххо киллэриини уонна көннөрүүнү» ирдиэхтэрин сөп. Онон Россия бэрэсидьиэниин туһаайыытын сарсыҥҥы күнүгэр Балаата Сэбиэтэ мустуоҕа, оттон муус устар 23 күнүгэр пленарнай мунньах ыытыллыаҕа.
