Кулун тутар 29 күнүгэр П.А.Ойуунускай аатынан Саха академическай тыйаатырга «Орфей уонна Эвридика» испэктээк премьерата буолар.
«Орфей уонна Эвридика» — греческэй мифологияҕа олоҕуран, сахалыы тылынан туруоруллар олоҥхо-перфоманс. Бу эдэр, талааннаах режиссер, тыйаатыр артыыһа, СӨ култууратын туйгуна Елена Оленова дебютнай үлэтэ буолар. Кини бэлиэтииринэн, хас биирдии актер бу испэктээккэ бэйэтэ ааптар буолар.
Испэктээккэ тойук, үҥкүү көмөтүнэн, ону тэҥэ саха төрүт үнүстүрүмүөннэрин туттан көрөөччүнү ураты эйгэҕэ киллэрэн, төрүт култуураны харыстыахха диэн санааҕа кэлэри режиссер ситиһэр.
«Социальнай ситимнэр, искусственнай өй сайдар аныгы үйэҕэ, биһиги, Олоҥхо тыйаатырын артыыстара, култуурабытын эппитигэр-хааммытыгар иҥэрэн норуоппут биир сомоҕо буолан, төрүт култууратын, үгэһин харыстыырыгар дьулуһабыт. «Орфей уонна Эвридикаҕа» эр киһи уонна дьахтар таптала буолбакка, тойук хайдах үөскээбитэ кэпсэнэр», — диэн Елена Семеновна эттэ.
Ол курдук, Орфей — Дмитрий Хоютанов, Эвридика — Ньургуйаана Маркова, Симэхсин Эмээхсин — Анастасия Алексеева уобарастарыгар тыыннаах муусука, олоҥхо уонна аныгылыы кэм ситимэ көстөр.
«Бу маннык, элбэх истиили холбоон, өссө туруорулла илигэ», — диэн режиссер санаатын үллэһиннэ.
Испэктээк дьиҥ-чахчы тыынын видеоҕа көрүҥ.
