Бүгүн, сэтинньи 19 күнүгэр, Россияҕа үрдүкү оскуола преподавателин күнэ бэлиэтэнэр.
Дойду үрдүк үөрэхтэрин кыһаларыгар 250-тан тахса преподавательүлэлиир, ол иһигэр Саха сиригэр — түөрт тыһыынча. Идэлээх бырааһынньыктарынан Россия үрдүк үөрэҕин уонна наукатын миниистирэ Валерий Фальков эҕэрдэлээтэ.
«Убаастабыллаах преподавателлэр, ыччаппыт туһугар күннэтэ хорсун быһыыны оҥороргутугар, сайаҕас сыһыаҥҥытыгар махтанабын. Коронавирус ыарыыта турбут уустук кэмигэр саҥа балаһыанньаҕа түргэнник сөп түбэһэн цифровой эйгэҕэ көстүгүт. Устудьуоннар хаачыстыбалаах билиини ылалларыгар төһүү күүс буолбуккутугар бигэ эрэллээхпин», — диэн миниистир суругар этиллэр.
Устудьуоннар инникитин Россияны сайыннарар исписэлиистэр буолалларын, оттон преподавателлэр кинилэр талааннанрын арыйалларыгар, олохторун суолун булалларыгар көмөлөһүөхтээхтэрин, бэрээдэктээх, аһыныгас буоларга иитиэхтээхтэрин уонна сыалларын ситиһэллэригэр кынаттыахтаахтарын чопчулаата.
«Преподаватель өрүү научнай билии күөнүгэр сылдьар, билбит-көрбүт уопутун үллэстэр, саҥардар. Эһиги эрэ устудьуоннары кытта тутуспутунан науканы умсугуйан үөрэтиэххитин, саҥаны арыйыаххытын сөп. Эһиги сыралаах үлэҕит, муударай өйгүт, истиҥ сыһыаҥҥыт дойдуга киэн туттуутун төрүөтэ буолбуттара. Устудьуоннар ситиһиилэрэ — эһиги идэҕит профессиональнай билиниитэ», — диэн миниистир бэлиэтээтэ.
Бырааһынньык 2021 сыллаахтан Валерий Фальков ыйааҕынан олохтоммута. Россия үрдүкү оскуолатын преподавателин күнэ Россияҕа наука уонна технология сылыгар, Россия бастакы үнүбэрсиэтин төрүттээччитэ Михаил Ломоносов төрөөбүт күнүгэр ананар.
