Бүгүн, ыам ыйын 22 күнүгэр Саха сиригэр сайылык күнэ бэлиэтэнэр. Бу туһунан СӨ баһылыгын уонна бырабыыталыстыбатын дьаһалтатын пресс-сулууспата иһитиннэрэр.
Бу бырааһынньык 2019 сылаахтан бэлиэтэнэр. Сайылык күнэ 2018 сыл сэтинньи 6 күнүгэр Ил Дархан Айсен Николаев ыйааҕынан төрүттэммитэ.
Бу күнү биһиги бэһис сылын ыам ыйын 22 күнүгэр бэлиэтиибит. Христианнар биир ытык бырааһынньыктара – Ньукуолун күнэ – сайын саҕаланыытын бэлиэтиир. Биһиги хотугу сирбитигэр бу күнү көрсө халлаан биллэрдик сылыйар буолан, сайылыкка көһөн тахсар үгэс олохсуйбута. Тымныы түһүөр диэри сүөһү хойуу оттоох сиргэ мэччийэн төлөһүйэр, үрүҥ тунах үксүүр.
«Саха сирин олохтоохторо бу күнү – айылҕабыт уһуктан, күлүм күммүт сылааһынан угуттаан, тула өттүбүт чыычаах ырыатынан туолан, күөххэ үктэнэр дьикти кэрэ кэммитин – үөрэ-көтө көрсөбүт. Өбүгэлэрбит үгэстэрин тутуһан, алаадьы, кус минэ буһаран, аймахтарбытын, доҕотторбутун, ыалларбытын кытта улахан остуол тула мустабыт», — диэн Айсен Николаев эттэ.
Бу күннэргэ тыа сирин олохтоохторо сүөһүлэрин үүрэн сайылыкка көһөллөр. Биһиги өрөспүүбүлүкэтигэр сайылык хаһаайыстыбатын сайыннарыы төрүт үгэһи чөл хаалларар соруктаах эрэ буолбакка, экэниэмикэ өттүнэн көдьүүстээх.
«Бу бырааһынньык күн тыа сирин туруу үлэһит дьонугар сыралаах үлэҕит иһин махталбын тиэрдэбин уонна таһаарыылаах үлэни баҕарабын! Саха Өрөспүүбүлүкэтигэр биллэриллибит Үлэ сыла эһиги сылгыт буолара туох да саарбаҕа суох. Күндү биир дойдулаахтарым! Эһиэхэ кытаанах доруобуйаны, эбиллэ турар эрчими баҕарабын! Саҕалаабыккыт табылыннын! Күүтүүлээх самаан сайыммыт өлгөм үүнүүлээх, үүт-сүөгэй быйаҥнаах буоллун!», — диэтэ Айсен Сергеевич.
