Бүгүн саха телевидениетэ төрүттэммитэ 56 сыла. 1963 сыллаахха алтынньы 8 күнүгэр бастакы биэрии тахсыбыта. Сыллата саха телевидениетин ситиһиитэ кэҥээн иһэр. Күн бүгүн өрөспүүбүлүкэ олохтоохторо араас биэриилэри итиэннэ нууччалыы тыллаах «Якутия 24», «Мамонт» ханааллары көрөр кыахтаахтар.
Күөх экранынан уу сахалыы саҥаны истээри, дьон-сэргэ араас ньыманан сигналы хабан, төһөлөөх үөрбүтэ буолуой? Оччолорго 13 саастаах Степа уолга телевизорынан бүтүн Саха сирин көрбүтэ-истибитэ космос куйаарыгар көппүт тэҥэ этэ.
«Телевидение биһиги олохпутугар наһаа улахан хардыыны оҥорбут. Дэриэбинэҕэ киэһэ аайы киинэ көрөр буоллахпытына, телевидение кэлэн, киинэни үтүрүйбүтэ», — диир көрөөччү Степан Сивцев.
Телевидениени төрүттээбит дьон ааттарын, бастакы диктордар куоластарын үйэтитээри, былырыын Телевидение уонна араадьыйа түмэлэ аһыллыбыта. Бастакы видеокамералар, былыргы кассеталар онтон да атын тэриллэр түмэл пуондатыгар толору. Итинтэн сүрүн миэстэни техника буолбатах, телевидение сайдарыгар кылааттарын киллэрбит дьон айымньылаах үлэтэ ылар. Бу туһунан күн бүгүн виртуальнай истиэндэ оҥоһуллар.
Быйылгы телевидение сезонугар хампаанньа көрөөччү баҕатын учуоттаан, сонун бырайыактары, биэриилэри толкуйдаата. Үс сахалыы сериалы тэҥэ, асчыттарга, эр дьоҥҥо аналлаах саҥа биэриилэр, өссө «Үҥкүүлээ» бырайыак, онтон да атыны ааттыахха сөп.
«Абааһы балаҕана» диэн эмиэ ураты сэргэх бырайыак. Быйыл Сунтаардааҕы филиал үһүс төгүлүн реалити-шоу бэлэмнээн, көрөөччү дьүүлүгэр таһаарар.
Маны сэргэ быйылгыттан ханаал интэриниэккэ үлэтин өссө күүһүртэ. 57 тыһыынчаттан тахса сурутааччылаах ютуб-ханаалыгар оҕолорго аналлаах биэриилэри, мультиктары сахалыы тылбаастаан көрдөрөн саҕалаата.
