Бэҕэһээ, олунньу 6 күнүгэр, Национальнай уус-уран түмэлгэ «Стихия. Даши Намдаков» быыстапканы Ил Дархан Айсен Николаев уонна биллиилээх скульптор Даши Намдаков үөрүүлээх быһыыга-майгыга арыйдылар.
Экспозицияҕа Даши Намдаков аатынан култуура уонна искусство сайдыытын көҕүлүүр пуонда, итиэннэ Бурятия өрөспүүбүлүкэтин национальнай түмэлин уонна В.И. Суриков аатынан Красноярскайдааҕы уус-уран түмэл айымньылаах үлэлэрэ турдулар.
«Биллиилээх худуоһунньук, скульптор, ювелир, график, норуотун, Россияны аан дойдуга аатырдыбыт Даши Намдаков быыстапкатын үөрүүлээх арыллыытынан эҕэрдэлиибин. Кини Чита куоратыгар тэйиччи баар сэлиэнньэҕэ төрөөбүтэ, итиэннэ Красноярскайдааҕы Илиҥҥи Сибиир институтун бүтэрбитэ уонна аан дойдуга биллибитэ. Үлэлэрэ ураты угуйар күүстээхтэр, атын тыыннаахтар», — диэтэ Айсен Николаев. Итиэннэ култуура уонна искусство сайдыытыгар кылаатын, өр сыллаах таһаарыылаах үлэтин иһин Даши Намдаковка өрөспүүбүлүкэ баһылыгын грамотатын туттарда.
Биллиилээх скульптор уруккуттан Саха сиригэр үлэлэрин билиһиннэрэр баҕа санаалааҕын эттэ. Култуурабыт, төрдүбүт-ууспут биир ситимнээҕин бэлиэтээтэ. Маны таһынан Саха сиригэр кэлбититтэн олус астыммытын-дуоһуйбутун туһунан санаатын үллэһиннэ.
Красноярскайга үөрэнэр сылларыгар кинини саха скульптора Эдуард Пахомов уһуйбутун олус долгуйан туран аҕынна. Кини маннык ыарахан матырыйаалы ис тыынныырга, искусствоны иэйиилээх оҥорорго үөрэппитин эттэ.
Итиэннэ Ил Дархаҥҥа, ≪АЛРОСА≫ хампаанньаҕа, бары тэрийээччилэргэ, сырдатааччыларга махталын биллэрдэ.
Национальнай уус-уран түмэл генеральнай дириэктэрэ Влада Тимофеева скульптор үлэлэрэ ураты тыыннаахтарын, киһини угуйар күүстээхтэрин бэлиэтээтэ.
Быыстапканы дьон-сэргэ Национальнай уус-уран түмэл сүрүн саалатыгар олунньу 7-тэн балаҕан ыйын 25 күнүгэр диэри көрүөн сөп.
Санатан эттэххэ, Дашинима Бальжимаевич Намдаков быыстапката Иркутскайтан Санкт- Петербурга, Токиоттан уонна Пекинтэн Нью-Йорка, итиэннэ Лондоҥҥа диэри турбута. Кини үлэлэрэ Европа, Азия уонна Америка сүрүн түмэллэригэр бааллар.
Хаартыска: Андрей Сорокин / ЯСИА
