Полиция үлэһиттэрэ Бүлүү өрүскэ ыыппыт бэрэбиэркэлэрин түмүгэр Бүлүү улууһугар сокуоннайа суох илиминэн балыктааһыны арыйдылар. Бу туһунан ИДьМ пресс-сулууспата иһитиннэрэр.
«Кыһыл Сыыр бөһүөлэгин чугаһынан өрүс кытылыгар турар микроавтобус массыынаттан 15 хатыыс уонна чыыр балыгы, ону тэҥэ мотуордаах тыыны буллулар. Ихтиологическай чинчийии быһаарбытынан, балыктары илиминэн туппуттар», — диэн этиллэр.
Полиция үлэһиттэрэ икки балыксыты доппуруостаабыттар, олортон биирдэстэрэ хас да төгүл холуобунай эппиэтинэскэ тардылла сылдьыбыт. «Уорбаланааччылар уу биологическай баайыгар оҥорбут хоромньулара 350 тыһыынча солкуобай кэриҥэ суумаҕа тэҥнэһэр», — диэн бэлиэтэнэр.
Эр дьоҥҥо «Уу биологическай баайын сокуоннайа суох бултааһын (тутуу)» ыстатыйанан холуобунай дьыала тэрилиннэ.
