Бүлүү улууһун дьаһалтата анал байыаннай дьайыыга сылдьар биир дойдулаахтарыгар гуманитарнай көмөнү, баһыылкалары ыытар. Ол курдук, бу күннэргэ 3 туонна мал-сал, таҥас-сап, ас-үөл байыастарга туттарыллар.
Бу туһунан Бүлүү улууһун дьаһалтатын телеграм-ханаала иһитиннэрэр.
СВО кыттыылаахтарын сайаапкаларынан эбии сэп-сэбиргэли, сибээс уонна көрүү-истии тэриллэрин тиэрдиэхтэрэ. Ол иһигэр киирсэллэр: мотоцикллар, генератордар, электропилалар, сыбааркалыыр аппараттар, балааккалар, пластиктан контейнердар, кырыысалар утары эмп-томп уо.д.а. Бу маны барытын байыастары өйүүр пуондаҕа урбаанньыттар, тэрилтэлэр кэллэктииптэрэ, улуус олохтоохторо туттарбыт үбүнэн-харчынан ылбыттар диэн бэлиэтэнэр.
Хаартыска: Бүлүү улууһун дьаһалтатын телеграм-ханаалыттан скрин
