Балаҕан ыйын 24 күнүгэр Бүлүү улууһугар балаҕан ыйын 19 күнүгэр сүппүт эр киһи көһүннэ.
Эр киһи (40-чэ саастаах) Дьокуускайтан Бүлүү улууһугар мас олордо кэлбит. Лөкөчөн сэлиэнньэтиттэн 30 км-дээх сиргэ үлэлээбиттэр. Балаҕан ыйын 19 күнүгэр күнүс ойуурга тахсан баран төннүбэтэх. Ол күн эр киһини көрдөөбүттэр даҕаны булбатахтар.
Балаҕан ыйын 20 күнүгэр СӨ Быыһыыр сулууспатын Үөһээ Бүлүүтээҕи көрдүүр-быыһыыр сулууспатын үс быыһааччыта квадрокоптердаах, тепловизордаах быһылаан тахсыбыт миэстэтигэр кэлбиттэр. Үлэҕэ полиция биэс үлэһитэ уонна 20 олохтоох кыттыбыттар. Балаҕан ыйын 24 күнүгэр 12.30 чааска сүппүт эр киһини булбуттар.
«Сүппүт киһини сүппүт миэстэтиттэн 3 км-дээх сиргэ буллубут. Эмсэҕэлээбит кэпсээбитинэн, эр киһи мунан баран бу күннэргэ ойуур устун сылдьыбыт. Балаҕан ыйын 20 күнүгэр хаар түспүтэ, бу күннэргэ самыырдаабыта. Эр киһи испиискэлээх сылдьыбыт буолан, кутаа оттубут, тэллэйинэн аһылыктаммыт. Вездеходунан сылдьыбыт быыһааччылар кини атаҕын суолунан буллулар», – диэн быыһааччылар бөлөхтөрүн старшайа Иван Иванов кэпсээтэ.
Эр киһини балыыһаҕа илдьибиттэр.
