Бүлүү улууһун Өкүндү ситэтэ суох орто оскуолатын үс бастакы кылааһын үөрэнээччитигэр маҥнайгы чуораан чугдаарда.
Улуус социальнай үлэтин Геройа Варвара Трофимова аатынан оскуола үлэтин 1931 сылтан саҕалаабыта.
2008 сыллаахха тыа сирин ситэтэ суох орто оскуолатыгар кадеттар кылаастара арыллыбыта. Бу кылаастарга нэһилиэк оҕолоро эрэ буолбакка, атын улуустан уолаттар кэлэн үөрэнэллэр. Тэрилтэҕэ байыаннай, эти-хааны эрчийэр, психологическай бэлэмнэнии куруһуоктара үлэлииллэр, байыаннай сбор ыытыллар.
68 оҕо үөрэнэр оскуолата өрөспүүбүлүкэтээҕи кадетскай оскуола ситимигэр киирэр уонна Дьокуускайдааҕы интернат-оскуоланы кытта ыкса үлэлиир.
Бүгүн, балаҕан ыйын 1 күнүгэр, үс бастакы кылаас үөрэнээччилэригэр анаан маҥнайгы чуораан чугдаарда.
