Бүтүн арассыыйатааҕы «ВИЧ бэрэбиэркэтэ: Экспедиция 2020» аахсыйа бэс ыйын 26 күнүттэн Камчаткаттан, Калининградтан саҕаламмыта уонна сэтинньи 16 күнүгэр түмүктэниэ. Аахсыйа чэрчитинэн бэрэбиэркэлиир мобильнай пууннар Россия 200 куоратын 45 өрөгөйүөнүн хабыахтара, ол иһигэр өрөспүүбүлүкэ куораттара: Алдан, Нерюнгри уонна Дьокуускай.
«Аахсыйа ВИЧ/СПИД тиэмэтин нэһилиэнньэҕэ тириэрдиигэ, ВИЧ бигэргэммит дьонугар сыһыаҥҥа, нэһилиэнньэ ВИЧ-инфекция бэрэбиэркэтин ааһарын ситиһиигэ туһуланар. Баҕалаах киһи анонимнай бэрэбиэркэни уонна сүбэни босхо ааһыан сөп. Аахсыйа кэмигэр олохтоммут санитарнай-эпидемиологическай миэрэ тутуһуллар», — диэн тэрийээччилэр иһитиннэрдилэр.
Бэс ыйын 26 күнүгэр икки хамаанда тэҥҥэ Камчаткаттан, Калининграттан турунна уонна сэтинньи 16 күнүгэр Казань куоракка аахсыйа түмүктэниитигэр тиийиэхтээхтэр.
«Аан дойдуга коронавирус пандемията турар кэмигэр инфекция атын көрүҥнэригэр болҕомто уурар эмиэ тоҕоостоох. ВИЧ-инфекцияны утары охсуһууну тохтотор табыллыбат. Аахсыйа 2016 сыллаахха тэриллибитэ, быйыл киэҥ далааһыннахтык ыытыллар. Дойду өрөгөйүөнэ барыта хабыллыа», — диэтэ РФ Доруобуйаҕа харыстабылын миниистирэ Михаил Мурашко.
