Биир киһи аатыгар хас да баан каартата оҥоһулларыгар дойду үрдүнэн хааччахтааһын ахсынньыттан киириэн сөп диэн РФ Судаарыстыбаннай Дууматын үп ырыынагар кэмитиэтин бэрэссэдээтэлэ Анатолий Аксаков «Известияларга» иһитиннэрдэ.
«Бу көҕүлээһин икки лимиты киллэрэри көрөр: биир бааҥҥа биэстэн элбэх каарта буолуо суохтаах уонна биир киһи бары бааннарга баар каарталарын ахсаана уопсайа 20-тэн тахсыа суохтаах. Бу иннинэ 10 каарта диэн этии киирбитэ, ол онтон аккаастаммыппыт», — диэн иһитиннэриигэ этиллэр.
Ону таһынан, ханнык бааҥҥа каарталары оҥотторбуттарын көрөргө анал сервис баар буолара былааннанар.
РФ Киин Баана бу сокуон бырайыагын өйөөбүтэ бэлиэтэнэр. Бу маннык хааччахтааһын киирэрэ түөкүттэри утары ыытыллар үлэҕэ туһалаах буолуоҕа.
Хаартыска: Мария Архипова / «Якутия 24»
