Эдьигээнтэн төрүттээх старшай лейтенант Анатолий Храмов «За отвагу», Суворов, «За боевые отличия», уонна иккис истиэпэннээх «За воинскую доблесть» мэтээллэринэн наҕаарадаламмыт.
СӨ култуураҕа уонна духуобунай сайдыыга миниистирэ Юрий Куприянов бэлиэтээбитинэн, поэт хомуурунньуга тахсарыгар биэдэмистибэ көмөлөһүөҕэ.
Анатолий Храмов РФ суруналыыстарын сойууһун чилиэнэ, «Арктика эдэр салайааччыларын» өрөспүүбүлүкэтээҕи уопсастыбаннай тэрилтэтин Биир кэлим сүбэтин бэрэссэдээтэлэ буолар.
Юрий Куприяновтыын көрсүһүүгэ Анатолий Храмов сулууспа уонна төрөөбүт дойдутун, Россия уонна бииргэ сулууспалаабыт уолаттарын туһунан хоһооннорун кэпсээбит.
«Байыастар талааннарын, чуолаан литературнай айымньыларын өйөөһүн — биһиги эбээһинэспит буолар. Анатолий — саҥа көлүөнэ киһитэ буоларын, санаатын күүһүн, дойдутугар бэриниилээҕин — хоһоонноро ойуулууллар. Бу сотору кэминэн бастакы хомуурунньук күн сирин көрүөҕэ», — диэн миниистир эттэ.
