Өрөспүүбүлүкэҕэ балаҕан ыйыгар, ону тэҥэ Ростов:на-Донуга госпитальнай хайысханан 1750 анал байыаннай дьайыы кыттыылааҕа уонна кинилэр дьиэ кэргэттэрэ 2100 тахса индивидуальнай уонна бөлөҕүнэн көрдөрдүлэр, ол иһигэр хат консультациялар уонна дьарыктар киирсэллэр. Бу туһунан брифиҥҥэ Дьокуускайдааҕы өрөспүүбүлүкэтээҕи психологическай киин дириэктэрэ Владимир Скрябин иһитиннэрдэ.
«Госпитальга киирэн сыппакка эрэ психологическай көмө хайдах оҥоһулларый? Бэйэ баҕаларынан көмө көрдүүллэр, оччотугар психологка сылдьарын курдук сөптөөх, табыгастаах бириэмэни талан биэрэллэр. Консультацияларга киһи кыбыстар тиэмэлэрэ суохтар диэн өйдүөххэ наада. СВО эрэ хайысхатынан буолбакка, бары көмөҕө наадыйар дьон анонимно көмө ылар кыахтаахтар. Докумуон игин наадата суох, ааты-суолу эппэккэ эрэ сымыйа, хос аатынан суруттарыахха сөп», – диэн Владимир Скрябин эттэ.
Көмөҕө суруттарар төлөпүөн нүөмэрэ: 8 (4112) 31-91-09 (үлэ кэмигэр). Улуустарга баар киин филиалларын төлөпүөннэрин бу нүөмэргэ эрийэн эмиэ билиэххэ сөп. Ону таһынан, эрэнэр төлөпүөн (телефон доверия) түүннэри-күнүстэри үлэлиир: 8-800-100-35-50 эбэтэр 122, онтон 6 уонна 2.
Анал байыаннай дьайыы кыттыылаахтарыгар, кинилэр дьиэ кэргэттэригэр, ону тэҥэ атын да хайысхаларга киин өҥөлөрүн босхо оҥорор. Бу хайысхаҕа үлэ Ил Дархан Айсен Николаев сорудаҕынан, СӨ Бырабыыталыстыбатын бэрэссэдээтэлин солбуйааччыта Ольга Балабкина салайыытынан ыытыллар.
Хаартыска: sakha.gov.ru
