«Балтийскай завод» үлэһиттэрэ «Якутия» атомнай ледоколга үлэни түмүктээтилэр. Бу туһунан СӨ бырабыытылыстыбатын уонна баһылыгын дьаһалтатын пресс-сулууспата иһитиннэрэр.
Сотору кэминэн мууһу бэйэтэ солоон айанныыр хараабылы оҥорооччулар корпуһу хомуйууну бүтэриэхтэрэ.
Муустаах пояс – үс м курдук кэтиттээх зона, бу зонаҕа атомнай ледокол мууһу кытта харсыһарыгар муҥутуур ноҕурууска бэриллэр. Суудуна бу сиэксийэлэрин 40 мм халыҥнаах тимиртэн хомуйаллар.
22220 бырайыак дэгиттэр атомнай ледоколлар — аан дойдуга саамай улахан уонна күүстээх суудуналар. Бу бырайыак суудуналара чугастааҕы сылларга Россия гражданскай ледокольнай флотун төрүтүнэн буолуохтаахтар.
«Хотугу муора суола сайдарынан, хотугу сиргэ таһаҕаһы таһыы эрэ буолбакка, Арктикаҕа бырамыысыланнас кииннэрин сайыннарыы боппуруостара быһаарыллыахтара. Сүрүн хайысханан саахал-быыһыыр систиэмэни саҥардыы уонна саахал-быыһыыр флоту тэрийии буолаллар. Ону таһынан, суудунаны оҥорор уонна өрөмүөннүүр тэрилтэлэргэ каадырдары бэлэмнииргэ, холбоһуктаах научнай-техническэй чинчийиилэри уонна бырайыактары ыытарга бииргэ үлэлээһини кэҥэтиэххэ уонна бөгөргөтүөххэ наада», — диэн Саха сирин Ил Дархана Айсен Николаев эттэ.
