Сунтаар нэһилиэгэр «Бары уруһуйдуубут» бырайыак эстафетатын бэлиэтин Дьокуускайга үөрэх үлэһиттэрин атырдьах ыйынааҕы сүбэ мунньахтарын тэрээһинин иитинэн Өлүөхүмэ улууһун делегацията үөрүүлээх быһыыга-майгыга туттарбыта.
Сунтаар улууһун оҕо уһуйааннарын иитиллээччилэригэр, оскуолалар уонна эбии үөрэхтээһин тэрилтэлэрин үөрэнээччилэригэр үгүс тэрээһиннэр, айар быыстапкалар, уруһуйга маастар-кылаастар, күрэстэр тиһигин быспакка ыытылыннылар.
Бырайыак эстафетатыгар барыта 33 оскуола, 19 уһуйаан, 3 эбии үөрэхтээһин тэрилтэтэ кыттыыны ылла.
Тэрээһин чэрчитинэн «Бары уруһуйдуубут» бырайыак эстафетатын бэлиэтин туттарыы үөрүүлээх түгэнигэр сыанаҕа Сунтаар нэһилиэгин үөрэх тэрилтэлэрин делегацияларын салайааччылара таҕыстылар.
