Николай Бауман аатынан Москва судаарыстыбаннай техническэй үнүбэрсиэтэ Саха сирин «Хоту» научнай-үөрэхтээһин киинин үлэтигэр кыттыыны ылыаҕа. Бу туһунан СӨ баһылыгын уонна бырабыыталыстыбатын дьаһалтатын пресс-сулууспата иһитиннэрэр.
Бүгүн, балаҕан ыйын 28 күнгэр Ил Дархан Айсен Николаев уонна үрдүк үөрэх кыһатын ректэрэ Анатолий Александров тустаах сөбүлэһиигэ илии баттаатылар.
Өрөспүүбүлүкэ бырабыыталыстыбатын бэрэссэдээтэлин солбуйааччытын э.т. Сергей Местников Москва судаарыстыбаннай техническэй үнүбэрсиэтин Арктическай бырагыраамаларга дириэксийэтин салайааччыта Родион Степановы кытта тутаах сыаллары уонна соруктары дьүүллэстэ.
Николай Бауман аатынан үнүбэрсиэт «Хоту» научнай-үөрэхтээһин киинин үлэтигэр кыттыыны ылыытын туһунан кэпсэтии былырыыҥҥаттан ыытыллар. Үрдүк үөрэх кыһата сэҥээрбитин биллэрдэ уонна партнер быһыытынан көхтөөх кыттыыны ыларга сөбүлэстэ. Ректор Анатолий Александров «Хоту» научнай киин коллегиальнай салайар уорганын Кэтээн көрөр сэбиэтигэр киирдэ.
Өрөспүүбүлүкэ Ил Дархана балаҕан ыйын ортото киин үлэлиир бырагырааматын үс хайысхатын бигэргэппитэ: «Хотугу киһи», «Сир баайын табыгастаахтык туһаныы», «Көдьүүстээх социальнай-экономическай инфраструктура». Бу хайысхалар чэрчилэринэн Россия научнай-техническэй сайдыытын сүрүн ирдэбиллэригэр эппиэттиир тоҕус бырайыагы олоххо киллэрии былааннанар.
