Бу туһунан Ил Дархан уонна СӨ Бырабыыталыстыбатын пресс-сулууспата иһитиннэрэр.
Юрий Чеботарь бэлиэтииринэн, Саха сирэ уонна Беларусь сылаас доҕордуу сыһыаннаахтар, атыы-эргиэн уонна экономика хайысхатыгар сибээстээхтэр.
«2024 сыл түмүгүнэн атыы-эргиэн 40%-нан улаатта. Ахсынньыга 2028 сылга диэри торговай-экономическай уонна култуурунай эйгэҕэ бииргэ үлэлиир сөбүлэҥҥэ анаммыт тэрээһиннэр былааннарыгар илии баттаммыта. Бу докумуон биһиги сыһыаммытын, ыытар үлэбитин бөҕөргөтөргө тирэх буолуоҕа. Үүнэргэ-сайдарга элбэх уопсай хайысхалардаахпыт», — диэн миниистир эттэ.
Кини бэлиэтииринэн, Саха сирэ уонна Беларусь төһө да ыраах сытар буолалларын үрдүнэн биир уопсай история кинилэри быстыбат ситимниир.
«Ыам ыйыгар бары бииргэ Улуу Кыайыы 80 сылын бэлиэтиэхпит. Ньиэмэс-фашистарын утары киирсэн дойдубутун дьоруойдуу көмүскээбиттэри Беларусь хаһан да умнубат. Саха сирин уолаттара Беларусь сиригэр-уотугар өстөөҕү утары кыргыспыттара. Биһиги кинилэринэн махтана саныы киэн туттабыт. Ис сүрэхпиттэн барыгытыгар эйэлээх халлааны, кытаанах доруобуйаны, дьолу, этэҥҥэ буолууну», — диэн Юрий Чеботарь баҕа санаатын эттэ.
