Бэҕэһээ, алтынньы 12 күнүгэр Горнайга Бэрдьигэстээҕэр эһиил 2024 сылга олохтоох көҕүлээһини өйүүр бырагыраамаҕа киирэр бырайыактары талар куоластааһын ааста. Бу туһунан нэһилиэк дьаһалтата уонна «Mаатта news» телеграм ханаал иһитиннэрэр.
Элбэх хайысхалаах спортивнай комплекска 211 киһи кэлэн инники куйаар ситимин нөҥүө элбэх куолаһы ылан бигэргэммит сэттэ үлэттэн – түөрт бырайыагы талла.
Хас биирдии талыллар бырайыагы нэһилиэк дьаһалтатын, түөлбэлэрин, тэрилтэлэрин исписэлиистэрэ, салайааччылара, мустубут дьон дьүүлүгэр ырытан кэпсээтилэр.
Түмүккэ суол оҥоруутугар хайаан да, үлэ барыахтаах диэн санаанан салайтаран нэһилиэк иһинээҕи суоллары өрөмүөннээһин, ууну аһардар хоруулары оҥоруу, Мэхээлэ Дьөгүөрэп аатынан сынньалаҥ киинин, фойетын саҥардан оҥоруу бырайыактара элбэх куолаһы ылан талылыннылар.
Маны тэҥэ хаар ыраастыыр тиэхиньикэни, олохтоох дьаһалтаҕа ылыы бырайыага инникки түһүмэхтэргэ элбэх куолаһы ылбыта эрээри, ППМИ балаһыанньатыгар хаар ыраастыыр техниканы ылыныы диэн суоҕунан сибээстээн, уоту умуруорууга туһаныллар баһаарынай уу баһар массыынаны киллэрдилэр.
Бу этиини кэлбит дьон 100 бырыһыаннара өйөөннөр, 211 куолаһы ылла. Уу баһар массыына бырайыагын улуус дьаһалтата, бырагыраамаҕа киллэрэн көмүскүөҕэ.
«Олохтоох көҕүлээһини өйүүр бырагыраама» аата да этэ сылдьарын курдук, нэһилиэнньэ бэйэтэ кыһалҕалаах, тыын суолталаах боппуруостарын талан, хамсааһыны ыытар, онон бырайыакка көрүллэр харчы уопсай сууматыттан 3 %-нын олохтоохтор бэйэлэрэ хардары үбүлүөхтээхтэр, маныаха эмиэ куоластааһын көмөтүнэн, ППМИ-нан үлэ барыытыгар уопсай нэһилиэнньэ, эбэтэр сыһыарыллыбыт түөлбэ биирдии ыалыттан 500 солк хомуйарга быһаардылар.
Инники бу бырагырааманан Бэрдьигэстээххэ 15 бырайыак олоххо киирбитэ:
2018 сылга
1. ПМК түөлбэҕэ оҕо оонньуур былаһаакката тутуллубута
2. Заречнай түөлбэҕэ оҕо оонньуур былаһаакката тутуллубута
3. МСО түөлбэ суола өрөмүөннэммитэ
2019 сылга
1. Сынньалаҥ пааркатыгар оҕо оонньуур былаһаакката сөргүтүллүбүтэ
2. «Ильмень күөлгэ өлбүттэргэ» пааматынньык өрөмүөннэммитэ
3. Сэлиэнньэ иһинээҕи суол өрөмүөннэммитэ
2020 сылга
1. Биир кэлим дизайн кодтаах оптуобус тохтобуллара туруоруллубуттара
2. Ууну аһардар хоруулары оҥоһуллубуттар
3. Чаҕылҕан, Пятилетка, Гагарина уулуссалар өрөмүөннэммиттэрэ
2021 сылга
1. Тарылҕан күөлүгэр фонтан туруоруллубута
2. Сынньалаҥ пааркатын трибуната өрөмүөннэммитэ
3. Сэлиэнньэ иһинээҕи суол өрөмүөннэммитэ
