Бэрэсидьиэн Владимир Путин федеральнай мунньахха 17-с туһаайыытыгар туох сүрүн этиилэри киллэрбитин туһунан ааҕыҥ.
Тыа сиригэр биэс тыһ. тахса скорай массыынатын түҥэтиэхтэрэ
Россия кыра куораттарыгар, нэһилиэктэригэр 5 000 кэриҥэ суһал көмө массыынатын ыытыахтара. Путин Судаарыстыбаннай сэбиэт мунньаҕар бу күннэргэ доруобуйа харыстабылын кыһалҕаларын быһаарсыах буолла.
Толорута суох дьиэ кэргэҥҥэ ыйдааҕы төлөбүр көрүллүөҕэ
8-16 саастаах оҕолоох толорута суох ыалларга от ыйын 1 күнүттэн саҕалаан ый аайы 5 650 солкуобай төлөнүөҕэ. Ону таһынан бэрэсидьиэн оскуолаҕа үөрэнэр, оскуолаҕа киирээри сылдьар оҕолоох ыалга биир кэмнээх төлөбүр оҥоруохха диэн этии киллэрдэ.
Үрдүк үөрэх кыһаларыгар эбии 45 тыһыынча миэстэ арыйыахтара
2021 сылга оскуоланы бүтэрээччилэр 60%-нара үрдүк үөрэх кыһаларыгар босхо киириэхтэрэ. Кэлэр икки сылга эбии 45 тыһыынча бүддьүөттэн үбүлэнэр миэстэни арыйыахтара. Ону таһынан 1 мөлүйүөн оҕоҕо 1,3 тыһыынча оскуола тутуллуоҕа.
Гражданскай чинчийиигэ 1,6 трлн солкуобай көрүллүөҕэ
Россия бырабыыталыстыбата 2024 сылга диэри гражданскай чинчийиигэ 1,6 трлн солкуобайы көрүөҕэ. Санатан эттэххэ, Владимир Путин быйылгы сылы Наука уонна технология сылынан биллэрбитэ.
Экологияҕа хоромньуну оҥорууга тэрилтэлэри эппиэккэ тардыы туһунан сокуону ылыныахтара
Тэрилтэлэргэ экологическай эппиэтинэһи күүһүрдэр туһунан сокуону түргэнник ылыныахха наада диэн бэрэсидьиэн Владимир Путин эттэ. Оҥорон таһаарааччылар тобохторун, бөхтөрүн суох оҥорорго эппиэтинэһи кэҥэтэр механизм быйылгыттан үлэлиэхтээх.
