Горнай улууһун Бэс Күөлүн 185 баһаартан эмсэҕэлээбит олохтооҕор 30-туу тыһыынча солкуобай көрүллүөҕэ.
«Ойуур баһаардарынан куттал суоһуур нэһилиэнньэлээх пууннарыгар олорор гражданнары аһынан уонна олорор сиринэн хааччыллыылаах эвакопууннарга тиэрдэллэр», — бу туһунан Саха сиринээҕи суһал штаб салайааччытын солбуйааччыта Ольга Балабкина иһитиннэрдэ.
Аһылык уонна олорор сир таһынан, бастакы наадалаах бирэдимиэттэринэн, таҥнар таҥаһынан хааччыйаллар.
«Маннык көмө источниктара судаарыстыбаттан уонна муниципальнай тэриллиилэртэн да үбүлэнэллэр, аһымал да буолаллар. ˂…˃ Алта аҕа саастаах киһи чөлүгэр түһэрии киинигэр киириэхтэрин баҕаралларын эттилэр. Аҕыстарыттан аҕа саастаах уон оҕону «Орленок» лааҕырга ыытыахпыт. Горнайга СӨ үлэҕэ уонна социальнай сайдыыга миниистирин солбуйааччыта Иван Алексеев үлэлиир. Баһаартан эмсэҕэлээбит дьон кыһалҕаларын бары боппуруостара Ил Дархан Айсен Николаев быһаччы хонтуруолугар баар», — диэн Ольга Балабкина эбэн эттэ.
