Ойуур баһаарыттан эмсэҕэлээбит Горнай улууһун Бэс Күөл сэлиэнньэтигэр тутааччылар саҥа дьиэлэргэ түннүктэри туруораллар, ититиини киллэрэн саҕалаатылар.
Чөлүгэр түһэрии үлэ хаамыытын туһунан СӨ Бырабыыталыстыбатын бэрэссэдээтэлин бастакы солбуйааччыта Дмитрий Бердников иһитиннэрдэ.
Кини этэринэн, үлэҕэ 164 киһи уонна 13 тиэхиньикэ кыттыбыт.
«Бүгүҥҥү күҥҥэ 29 дьиэ кэмпилиэгэ араас истиэпэн бэлэмнээх диэххэ сөп. 30-с дьиэ кэмпилиэгэ сүөкэммитэ, ону дэриэбинэҕэ ыыппыппыт. 20 дьиэ кырыыһата таҥыллан түмүктэннэ, 18 дьиэҕэ ититиини, фасадтары таҥыы, түннүктэри туруоруу уонна дьиэ иһинээҕи өттүгэр үлэ барар», — диэтэ кини.
Ону таһынан олорор дьиэлэр учаастактыгар тардыы үлэлэрэ ирдэнэр буоллаҕына эбии алта ЛЭП туруоруохтара.
«Гаастааһын үлэлэрэ бу нэдиэлэҕэ биэс учаастакка түмүктэниэхтэрэ», — диэтэ Дмитрий Бердников.
Үлэ барыта былааннаммыт болдьоҕунан баран иһэрин туһунан СӨ Бырабыыталыстыбатын бэрэссэдээтэлин бастакы солбуйааччыта бэлиэтээтэ.
