Горнай улууһун Бэс Күөлүгэр баһаартан эмсэҕэлээбит ыалларга дьиэ тутуута түмүктэммитэ. Тутааччыларга хамнас кэмигэр төлөнөр. Бу туһунан тутуу министиэристибэтэ иһитиннэрэр.
Социальнай ситимҥэ «Аурис» хампаанньа тутааччылара хамнастарын ыла иликтэр диэн сурах тарҕаммыта. Бу тэрилтэ үс дьиэни туппут, иккитинэн аакта оҥоһуллан, төлөбүр счетка барбыт. Үһүс дьиэни тутуу туһунан докумуоннары Саха сиринээҕи госзаказчик сулууспатыгар ыыта иликтэр. Тоҕо диэтэххэ хампаанньа дириэктэрэ балыыһаттан алтынньы 25 күнүгэр саҥа тахсыбыт.
«Технадзор докумуоннары бэрэбиэркэлээбитин, отчуоту туппутун кэннэ, аактанан төлөбүр харчыта ыытыллыаҕа», – диэн иһитиннэриигэ этиллэр.
Бэдэрээтчиккэ үлэтин саҕалыан иннинэ аһылыкка, тутуу матырыйаалыгар 30%-наах аванса ыыппыттар. Бэс Күөлүгэр уопсайа 9 тэрилтэ 250 тутааччыта үлэлээбит.
