Саха сирин биатлонистара Новосибирскайга ыытыллыбыт бүтүн Россиятааҕы юниордар күрэхтэһиилэригэр мэтээллэри ыллылар. Бу туһунан өрөспүүбүлүкэтээҕи олимпийскай резервэни бэлэмниир оҕо спортивнай оскуолатын хайыһар спордун пресс-сулууспата иһитиннэрэр.
Чульмантан төрүттээх, спорт маастарыгар кандидат Регина Петрова 10 килэмиэтир дистанцияҕа 17-18 саастаах кыргыттарга хамаанданан кыттан кыһыл көмүс мэтээлинэн наҕараадаланна.
Амма улууһуттан төрүттээх, спорт маастарыгар кандидат Николай Максимов иккис миэстэ буолла. Спортсмен күрэхтэһии иннинэ коронавирустаабыт, ол иһин Саха сирин сүүмэрдэммит хамаандатын сүрүн тренерэ Альберт Сафаров бэлэмнээбит бырагырааматынан дьарыктаммыт.
Инникитин дойду сүүмэрдиир хамаандатыгар хас да быһаарыылаах күрэхтэһии баар.
Быйыл олимпийскай чемпион Виктор Мамонтов бирииһигэр ыытыллар күрэхтэһиигэ 200-чэ спортсмен кыттыаҕа. 15-16 саастаахтар, 17-18 саастаахтар диэн икки бөлөххө араарыахтара. Манна Удмуртия, Башкортостан, Бурятия, Алтайскай, Забайкальскай, Красноярскай кыраайдар, Иркутскай, Новосибирскай, Московскай, Псковскай, Сахалинскай, Томскай уобаластар биатлонистара кыттыыны ылыахтара.
