Магадантан сылдьар айанньыт уонна блогер, бүтүн Россиятааҕы «Дальний Восток – Земля приключений» күрэх дьүүллүүр сүбэтин чилиэнэ Богдан Булычев күрэххэ кыттарга ыҥырар.
«Күрэх олус судургу буолар. Эһиги Уһук Илиҥҥэ айанныыгыт уонна ол туһунан видеоҕа устаҕыт. Видео кылгас буолар, аҕыс мүнүүтэттэн уһуо суохтаах. Манна айаҥҥыт туһунан кэпсиигит. Видео информативнай уонна дьон интэриэһин тардыахтаах. Күрэх сайтыгар видеоҕытын таһаараҕыт. Ол кэнниттэн дьүүллүүр сүбэ видеолары барыларын көрөн баран саамай үчүгэй үлэлэри талар. Кыайыылаахтар сыаналаах бириистэргэ тиксиэхтэрэ. Ол курдук, гран-при үс мөл солк ылар, онтон номинация аайы бастакы миэстэни ылбыттар — биирдии мөл солк. Оннук үс номинация баар: «Сатыы айан», «Уунан айан» уонна «Кыһыҥҥы айан». Ону тэҥэ иккис, үһүс миэстэлэргэ анаан 300 тыһ уонна 100 тыһ бэриллиэҕэ. Онон дьэ кыттыҥ, кыайыҥ уонна Уһук Илиҥҥэ айаҥҥытыттан дуоһуйун. Биһиги дойдубут уонна Уһук Илин олус кэрэ көстүүлээхтэр! Уһук Илиҥҥэ көрсүөххэ диэри уонна «Дальний Восток – Земля приключений!» күрэххэ ситиһиилэри!», – диэтэ Богдан Булычев.
Санатарбыт курдук, ыам ыйын 1 күнүттэн ахсынньы 30 күнүгэр диэри күрэх иккис сезонугар сайаапкалары бырайыак сайтыгар ыытыахха сөп: https://путешественникдв.рф
Күрэххэ кыттарга анаан Уһук Илининэн айаннарын туһунан кылгас киинэ уһулаллар уонна дьүүллүүр сүбэҕэ сыаналыырга ыыталлар.
Номинациялар: гран-при (саамай үчүгэй айан); сатыы айан (сатыы поход, айылҕаҕа бэлэсипиэтинэн сырыы); ууга айан (өрүскэ, муораҕа, уу аннытынан устуу, серфинг); кыһыҥҥы айан (хайыһарынан сырыы, ыттардаах айан, кыһыҥҥы бэлэсипиэтинэн сырыы, сноубордунан айан). Анал болҕомтону Уһук Илини бастакы арыйааччылар сылдьыбыт урукку хайысхаларынан айаҥҥа уураллар.
Күрэххэ уон саастарыттан саҕалаан оҕолор уонна улахан дьон кыттыахтарын сөп.
Түмүккэ кыайыылаахтар үлэлэрин регионнааҕы телеханаалларга көрдөрүөхтэрэ, онтон Уһук Илин регионнарынан туристическай айан интерактивнай хаартатыгар угуохтара.
Күрэх Россия бэрэсидьиэнин Уһук Илиҥҥи Федеральнай Уокурукка боломуочуйалаах бэрэстэбиитэлэ Юрий Трутнев көҕүлээһининэн, Россия бэрэсидьиэнин Уһук Илиҥҥи Федеральнай Уокурукка боломуочуйалаах бэрэстэбиитэлин аппаратын, Россия Уһук Илин сайдыытын министиэристибэтин, АО «Уһук Илин уонна Арктика сайдыытын корпорациятын», НКО «социальнай көҕүлээһиннэр сайдыыларын пуондатын» көмөлөрүнэн ыытыллар.
