Россиятааҕы Борис Ельцин аатынан бэрэсидьиэн библиотекатыгар көҥүл киирэр кыах Саха сирин бастакы бэрэсидьиэнин Михаил Николаев аатынан библиотекаҕа — Николаев кииҥҥэ баар буолла. Манна анаан саҥа ааҕар саала арылынна. Ельцин библиотекатын электроннай көрүҥүгэр Россия судаарыстыбатын, историятын уонна нуучча тылын туһунан сүдү суолталаах докумуоннар куоппуйалара хараллан сыталлар. Библиотека сүрүн киинэ Санкт Петербурга баар итиэннэ Москва уонна Тюмень куораттарга филиаллардаах. Маны тэҥэ дойду үрдүнэн 1500 тахса электроннай ааҕар саалалардаах.
“Өрөспүүбүлүкэҕэ Саха сирин национальнай библиотеката уонна Ил Түмэн судаарыстыбаннай мунньаҕа аан бастакынан Ельцин библиотекатынан туһанар көҥүлү ылбыттара. Оттон үсүһүнэн бу Николаев кииҥҥэ историческай сэдэх докумуоннары, федеральнай архыыбы кытта үлэлэһэр кыах тосхойдо. Чаппаай бөһүөлэгэр оҕо талаанын, кыаҕын сайыннарар араас үөрэх-сайдыы кыһалара үлэлииллэр, онон ааҕар саала манна арыллыбыта сүдү суолталаах ”, диэн Саха өрөспүүбүлүкэтин национальнай библиотекатын дириэктэрэ Саргылаана Максимова бэлиэтээн эттэ.
Ааҕар саала арыллыытын үөрүүлээх тэрээһинигэр Николаев кииҥҥэ Ельцин библиотекатын регионнары кытта үлэҕэ департаменын дириэктэрэ — Тюмень куораттааҕы филиал дириэктэрэ Олег Шор кыттыыны ылла.
“Чуолаан манна, Россия бастакы национальнай электроннай пуондатыгар хараллан сытар биир мөл.-тэн тахса докумуону көрүөххэ сөп. Бу 90-тан тахса куоппуйа. Үөрэхтээһин сайдыытыгар улахан суолталаах. Онон үүнэн эрэр көлүөнэ, оҕо-ыччат билиитин хаҥатарыгар биһиги өссө күүскэ үлэлэһиэхпит,” — диэн эттэ.
Саҥа ааҕар кииҥҥэ үлэлииргэ бары усулуобуйа тэрилиннэ. Ол курдук, манна түөрт анал үлэлиир миэстэни оҥордулар. Онон хас биирдии баҕалаах киһи кэлэн бэрэсидьиэн библиотекатын пуондатын, ол иһигэр сэдэх кинигэ маҥнайгы таһаарыыларын сыыппаранан куоппуйаларын, архыып докумуоннарын, научнай үлэлэри, аудио уонна видео матырыйааллары кытта үлэлиэн сөп.
“Президент библиотекатын пуондата биһиги ааҕааччыларбытыгар, итиэннэ манна кэлбит оҕолорго,манна үлэлиир дьоҥҥо улахан кыаҕы биэрэр. Инникитин наукаҕа хардыы оҥороллоругар бу докумуоннар төһүү күүс буолуохтара диэн саарбаҕа суох”, — диэн СӨ духуобунай сайдыыга уонна култуураҕа миниистирин бастакы солбуйааччы Афанасий Ноев эттэ.
“Күн бүгүн Чаппаай бөһүөлэгэ науканан умсугуйан дьарыктанар ыччат биһигэ. Манна наука Дьоҕус академията үлэлиир буолан өрөспүүбүлүкэ бары муннугуттан үөрэнээччилэр, устудьуоннар мусталлар. Дойду сүрүн библиотекатын пуондата үүнэн эрэр көлүөнэни патриотическай тыыҥҥа иитэргэ көмө буолуоҕа”, — диэн СӨ национальнай библиотекатын дириэктэрэ Саргылаана Максимова эбэн эттэ.
Ааҕар киин үөрүүлээх арыллыытын кэнниттэн библиотека эйгэтин үлэһиттэрэ, муниципальнай оройуоннар үөрэҕирии салалталара кыттыылаах төгүрүк остуол ыытылынна. Библиотека үлэһиттэрэ Бэрэсидьиэн библиотекатын пуондатынан хайдах туһанары сиһилии кэпсээтилэр. Итиэннэ инникитин өрөспүүбүлүкэ улуустарыгар арыйан үлэлэтэр туһунан дьүүллэстилэр. Төгүрүк остуолга видео сибээһинэн атын регионнар библиотекалара, Хабаровскай кыраай, Амур уобалаһа, Бурятия өрөспүүбүлүкэтэ уонна Приморскай кыраай холбоннулар. Тэрээһин СӨ национальнай библиотекатын уонна Ельцин аатынан бэрэсидьиэн библиотекатын икки ардыгар бииргэ үлэлэһэр туһунан сөбүлэҥи баттаһыынан түмүктэннэ.
