Уус Алдан улууһун Бороҕонугар 2026–2027 сылларга Лөгөй Тойон киин болуоссатын тупсарсыахтара. Бу сыалга федеральнай үбүлээһинтэн 50 мөл солк көрүллүө. Бырайыак дойду бэрэсидьиэнэ Владимир Путин көҕүлээбит «Инфраструктура для жизни» национальнай бырайыак «Формирование комфортной городской среды» федеральнай бырагыраама чэрчитинэн олоххо киирэр.
Киин болуоссат нэһилиэнньэлээх пуун бэйэтэ эрэ буолбакка бүтүн Уус Алдан улууһа барыта сылдьар, сынньанар сирэ буолар. Манна сезоннай павильоннары оҥоруохтара, хомуйуллар сыананы туруоруохтара, үүнээйилэри олордуохтара, уопсастыбаннай көрсүһүүлэри ыытар сир буолуоҕа. Бырайыагы таҥан оҥорор архитектурнай бюро GRD:. Үлэни хонтуруоллуур Ил Дархан иһинэн архитектура уонна куораты тутуу дьаһалтата уонна сири сайыннарыы киинэ.
Бороҕон олохтоохторо тупсарыы куонкурустарыгар уонна мунньахтарыгар көхтөөх кыттыыны ылаллар. Кинилэр киин болуоссат бырайыагын куоластааннар өйөөтүлэр, ону тэҥэ бэйэлэрин этиилэрин киллэрэллэр. Уопсастыбаннай көрсүһүүлэргэ төрөөбүт санаалар олоххо киирэллэригэр, сэлиэнньэ сайдыытыгар кыттыыны ыларга маннык көҕүлээһиннэр наадалар диэн олохтоохтор бэлиэтииллэр. Федеральнай бырагыраамалар көмөлөрүнэн ыччат, оҕолордоох ыаллар уонна аҕам саастаахтар табыгастаах сынньанар уонна култуурунай тэрээһиннэри ыытар сирдэнэллэр диэн дьон-сэргэ бэлиэтиир.
Бырайыак тупсаҕай куорат эйгэтин тэрийиигэ бастыҥ бырайыактар X бүтүн Россиятааҕы куонкуруһун чэрчитинэн Уһук Илиҥҥи Уокурук субъектарыгар IV куонкурус кыайыылаахтарын ортолоругар киирдэ. Куонкурус түмүктэрин Казаньҥа атырдьах ыйыгар биллэрбиттэрэ. Саха сирин сэттэ бырайыага 420 мөл солк уопсай суумалаах федеральнай үбүлээһини ылла. Кинилэр ортолоругар — Тиксии, Эдьигээн, Бороҕон, Лиэнскэй, Уус Маайа, Ытык Күөл уонна Чурапча болуоссаттарын уонна кытылларын тупсарыы.
Хаартыска: sakha.gov.ru
