Булуҥ улууһугар «Булункан» кытылын ыраастыыр үлэлэр саҕаланнылар, хаарбах тимири хомуйар бастакы исписэлиистэр кэллилэр. Бу туһунан СӨ бырабыыталыстыбатын уонна баһылыгн дьаһалтатын пресс-сулууспата иһитиннэрэр.
Доброволецтар хомуйбут тимирдэрин бастаан Өлүөнэ өрүһүнэн баарсанан Аллараа Бэстээх ыстаансыйатыгар тиэрдиэхтэрэ. Онтон поеһынан Амурскай уобаласка, эбэтэр Череповецка ыытыахтара. Бу экспедиция — Тиксии бөһүөлэгэр уонна Арктика атын да оройуоннарыгар киэҥ хабааннаах ыраастааһын саҕаланыыта. Ил Дархан Айсен Николаев этэринэн, 2024 сылга диэри 100 тыһыынчаттан тахса туонна хаарбах тимири таһары былаанныыллар.
Волонтердар бөлөхтөрүн салайааччыта Алексей Рудковскай этэринэн, бөҕү хомуйан переработкаҕа ыытыы сыаннаһы уларытар, дьону тулалыыр эйгэни харыстыырга ыҥырар.
«Киэҥ нэлэмэн Арктика балаһата биһиги дойдубутугар сытар, онон харыстыыр уонна сайыннарар эбээһинэстээхпит», — диэтэ кини.
2024 сылга диэри Тиксии бөһүөлэгин мунньуллубут бөхтөн, ол иһигэр хаарбах тимиртэн ыраастааһын соруга турар. Бөһүөлэк көстүүтүн тупсарарга быраҕыллыбыт тутуулары эмиэ көтүрүөхтэрэ.
Үлэ бырайыакка кыттааччылар үптэрин суотугар ыытыллыахтаах. Онуоха бырайыагы олоххо киллэриигэ кыттар коммерческай тэрилтэлэри кытта Арктика нэһилиэнньэлээх пууннарын социальнай-экономическай сайыннарыы, ол иһигэр социальнай суолталаах бырайыактары олоххо киллэрии туһунан сөбүлэҥи түһэрсии былааннанар.
