Ойуур баһаардарынан буруо хойдон, киин куораттан Өлүөнэ өрүһүнэн паром сырыыта тохтоото. Бу туһунан СӨ тырааныспар министиэристибэтин пресс-сулууспата иһитиннэрэр.
«Уу суолунан сырыы быраабылатыгар сөп түбэһиннэрэн социальнай суолталаах линияларынан пассажирдары таһыы тохтоото, ол аата — «Дьокуускай-Сангар», «Дьокуускай-Өлүөхүмэ». «Дьокуускай-Аллараа Бэстээх» маршрутунан пассажирдары таһыы уонна паром сырыыта эмиэ тохтоото», — диэтэ пресс-сэкирэтээр Евгений Тен.
Күн-дьыл туруга тубустаҕына суудуналар устуулара сөргүтүллэрин туһунан бэлиэтээн эттэ.
Ойуур баһаардарынан балаһыанньа туһунан билиһиннэрэр брифиҥҥэ Саха сирин баһылыга Айсен Николаев, киин куоракка Горнай уонна Нам ойуурдарын баһаарын буруота биллибитин эттэ. Ону тэҥэ, нэһилиэнньэлээх пууннары уоттан харыстыыр сыалтан тэриллибит утары уот буруота буоларын бэлиэтээтэ.
